Serchhip-ah Anaemia Camp neih a ni

Niminpiah khan Serchhip-ah Anaemia Camp neiin he hun hi Millet (Buhtun) ei a that zia leh Anaemia venna tha tak anih thu inzirtirna hun atana hman a ni.
Women & Child Development, Serchhip District-a District Programme Office; Child Development Project Officer (CDPO) Office leh Health Department tangkawpin an buatsaih Anaemia Camp hi Serchhip CMO Conference Hall-ah neih niin thupui atan ‘Test Treat Talk’ tih chu hman a ni a, he hun hi Poshan Abhiyan-a District Coordinator James Lalremliana chuan kaihruaiin Ministry of Women & Child Development in ruahmanna a siam angina ni 20th March – 3rd April, 2023 chhung hian Hapta hnih chhung awh Poshan Pakhwada an hman mek thu a sawi a. He hun hi Chaw tha ei a tul zia inzirtirna niin, a bik takin tleirawlten chaw tha an ei theih nana inzirtirna chi hrang hrang an kalpui mek thu a sawi bawk.


He hunah hian Serchhip CDPO Caryll Lalpari chuan Central sawrkarin hmeichhe tleirawlte a ngaipawimawh em em tih sawiin, an Veng theuha Anganwadi Centre-ah chhinchhaih vek niin kum khat chhunga chawtha an ei tur a thlawnin an dawn vek dawn thu leh chu chuan thisen tlakchhamna (Anaemia) a ven dawn thu a sawi a. Tleirawlte hi an hrisel chuan nakinah fa nei rual an nih hunah fa hrisel tak an la hring thei dawn a, chuvang chuan tun atangin an ei leh in te pawh uluk turin a chah a, “Chung zingah chuan Millets (Buhtun) hi chawtha niin khawvel huap pawha a that zia inzirtir mek a ni a, taksa tana tha tinreng a pai a, ei tam kan inzirtir mek a ni,” tiin tui kan tih zawng chauh ei lovin kan taksa in a mamawh pai tur thil chi hrang hrang kan ei a tul thu a sawi a ni.

He hunah hian Resource Person atan RBSK-a MO Dr. Lalhruaikima chu hman niin kan taksa in kan mamawh tawk thisen a pai loh chuan Anemia natna kan nei tihna a nih thu leh he natna hi khawvel puma mi hrang hrangin harsatna an tawh langsar tak a nih thu a sawi a. “A lo lanchhuah dan chu taksa a lo dawldang a, tin a lo dang thin a, taksa zawi te, chauh thutte, ngaihtuahna hmang ding thei lo te in an awm thin,” tiin a bik takin hmeichhe tleirawlte chu taksa inthlakthleng hunlai niin thisen mamawhna a sang a, thla tin hneichhe hunbi nei chhoh hun anih bawk avangin thisen tlakchhamna hi a thleng duh em em tih a sawi bawk.

He hunah hian Anganwadi Centre hrang hranga tleirawl kum 14-18 inkar thlanchhuah te telin an HB enfiah sak an ni a, Serchhip SMO Dr. Lallawmkimi pawhin ei leh in kan fimkhur a tul thu leh kamram ei mai mai lovin mahni In-ah a hunbi ah chaw pangngai ngei ei thin tur a nih thu he hunah hian a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man