Kum 2019-ah thisen enfiah atanga chhutin Serchhip District-ah HIV+ hmuhchhuah an tam ber

Kum kalta chhung khan Mizoram District hrang hrang zinga thisen enfiah atanga za zela chhutin Serchhip District chu HIV hrik kai hmuhchhuah tamna ber nia thudawn a ni a. Nikum chhung khan Serchhip District chhunga thisen enfiah 1966 atangin HIV hrik pai mi 64 hmuhchhuah an ni.

Integrated Counseling & Testing Centre (ICTS) Serchhip atanga thu kan dawn danin nikum (2019) January atanga December thla thleng khan Serchhip District-ah mi 1966 te thisen enfiah atangin HIV hrik pai mi 64 hmuhchhuah a ni a, thisen enfiah zawng zawng atanga za zela 3.25 te chu HIV hrik pai ang niin hei hi District hrang hrang zingah za zela chhutin a sang ber a ni. Nikum chhung khan ICTC Serchhip-ah hian mipui nawlpui te thisen enfiah 1064 awmin heng atang hian HIV hrik pai 55 hmuhchhuah an ni a, raipuar mi 902 te thisen enfiah atangin HIV hrik pai mi 9 hmuhchhuah an ni bawk a ni. Nikum chhung khan mipui nawlpui thisen enfiah tam ber thla chu August thla niin mi 112 te thisen enfiahna atangin HIV hrik pai mi 7 hmuhchhuah an ni a, February thla ah HIV hrik pai mi 7 bawk hmuhchhuah niin thla khata hmuhchhuah tam ber thla an ni a, January, April, July, September, October leh November thla ah mi 5 theuh hmuhchhuah awmin March leh May thla-ah mi 4 ve ve leh June thla-ah mi 2 hmuhchhuah niin HIV hrikpai hmuhchhuah tlem ber thla December-ah mi 1 hmuhchhuah an ni bawk. ICTC Serchhip-ah hian nu naupai te pawh an thisen enfiah zel niin January thla-ah nu naupai 3 te chu HIV hrik pai an ni tih hmuhchhuah an ni bawk a, March thla leh July thla-ah mi 2 ve ve leh February leh November thla-ah mi pakhat ve ve hmuhchhuah an ni bawk.
Hei bakah hian nikum-a thla thum, January 25 atanga April 25 chhung khan ram-puma District hrang hrangah raipuar Survey neiin hetah hian District tin hian raipuar mi 400 zel te thisen sample lain hetah hian India rampum-ah Serchhip District chu HIV hrik pai hmuhchhuah ah a sang ber dinhmun ah a ding nia thudawn a ni bawk.
Serchhip ICTC Centre hi April 1, 2003-ah hawn niin hemi kum July thla atangin thisen enfiah hna hi an thawk tan a, thisen enfiah hna an thawh atanga nikum kumtawp thleng khan mipui nawlpui te thisen an enfiah 16,327 atangin HIV hrik pai 252 hmuhchhuah an ni tawh a, Nu raipuar mi 9186 te thisen an enfiahna atangin HIV hrik pai 71 hmuhchhuah an ni tawh bawk a, a vaiin mi 25,513 te thisen an enfiah tawh atangin HIV hrik pai mi 323 hmuhchhuah an ni tawh a ni.
Serchhip ICTC-a thawktute chuan Serchhip District dinhmun chu a duhawm loh hle tih sawiin, HIV inkaichhawnna tam ber hi mipat hmeichhiatna hman khawloh a nih thu leh inchiuna hriau thianghlimlo inhmantawm in a dawt thu an sawi a, thisen thianghlim lo dawn atanga kai erawh an awmloh thu sawiin, he kan dinhmun hi mipui ten in enfiahna atana hmangin kan inven fimkhur a tul thu leh a bik takin thalai leh tleirawl kum naupang zawk te hnenah inzirtirna uar zawka kalpui zel a tul thu an sawi bawk.

Comments

Chhiar Hlawhte