MJA (SD) Member ten Serchhip District chhunga PMGSY hnuaia hnathawh thenkhat an tlawh

MJA Serchhip District member te chuan Ningani leh Zirtawpni khan Serchhip District chhunga sawrkar laipui ruahmanna anga Pradhan Mantri Gram Sodak Yojana (PMGSY) hnuaia hnathawh thenkhat te a hmunah tlawhin an enfiah.
MJA Serchhip District Member mi 7 te hian Serchhip District Information & Public Relations Officer, K. Saitluanga MIS kaihhruaina hnuaiah Ningani zing khan Serchhip chhuahsanin PMGSY hnuaia hmalakna te hi an tlawh a, Khawlailung leh Piler inkar kawng hnathawh mek tlawh hmasa berin C. Lalfakzuala, JE in a hmunah lo dawngsawngin Piler kawng thawh mek chungchang a lo hrilhfiah a, he Kawng hi Survey-ah KM 4.16 a nih laiin Formation Cut tih fel hnuah meters 173 velin a thui belh a. Contractor hi Roenga, Republic Veng Aizawl niin cheng nuai 730-a zo thei tura ruahman a ni a, GSB phah zo tawhin WBM an phah mek a, kumin May thlaah zawh beisei a ni.
Hemi hnu hian Hmunzawl panin Lungpho leh Hmunzawl inkar kawng kum 2016-a thawh zawh tawh, Contractor in a enkawl chhunga la awm mek si leh chutiang thova thawh zawh hlim Rullam leh Lungpho inkar te an en zui leh a, a bialtu SDO, Lalrintluanga leh bialtu JE ten lo dawngsawngin tun dinhmuna heng kawng chinchang te hi report an pe bawk. Lungpho to Hmunzawl hi KM 30.80 a sei niin F. Kapsanga Construction (FK)  ten an thawk a, estimate hi cheng nuai 2093.43 niin March, 2016 khan an zo tawh a, March 2021 thleng enkawl zui hi contractor kuta awm a ni a, Rullam leh Lungpho inkar KM 16.90-a thui niin H. Thangzova, Tuikual North in cheng nuai 963.68 in a thawk a, November 2016 ah a zo tawh a, a enkawl zui hna hi November 2021 thleng contractor kutah a awm bawk a. Heng kawng te hi thawmthat ngai a awm nual nia an hriat thu MJA member te chuan an sawi a ni.
Hemi hnu Zirtawpni khan Thentlang leh Sialhau inkar kawng PMGSY sum hmanga hna thawh mek chu tlawhin he kawng enkawltu SDO, Lalduhzuala leh Contractor ten lo dawngin hmalakna tlangpui an lo hrilhfiah a, Contractor hi V. Lalbiakzama, Venghlui niin kawng thui zawng hi KM 19.540 a ni a, estimate hi cheng nuai 1188.58 a ni. He kawng hi thawh zawh la ni lovin bul tanna a ala rei lo a, thawktute an inbuatsaih mek a, nakum March thla ah zo hman tura ruahman a ni. MJA te hian Serchhip district chhung Lungpho tlang dung leh Serchhip tlang dung inpawhna kawng tha, kum tluana tlan theihna kan la nei rih lo chu an vei thu leh ruahmanna a awm leh awm loh an zawhna chhangin Lalduhzuala, SDO chuan, Sialhau Pengthuam leh Lungpho Ramrikawn inkar kawng hi PMGSY-2 ah proposal thehluh a nih thu te, Khawlailung leh Hmunzawl inkar kawng pawh survey tura ruahman a nih thu te a sawi a. A hlawhtlin thuai an beisei thu a sawi bawk.

Comments

Chhiar Hlawhte