Soil Health Card Day hmang

Agriculture Department buatsaihin nimin khan Aizawl-a Agriculture Conference Hall-ah Soil Health Card Day puala hun hman a ni.
Soil Health Card Day puala inkhawm ah hian Agriculture (Crop Husbandry) Director, Rohming-thanga Colney chuan loneituten thlai mamawh ang zela lei tihthatna (fertilizer) an hman thiam theih nana kaihhruai chu he Soil Health Card Scheme-in a tum lian tak a nih thu a sawi a. He Scheme hmang hian loneitute buh leh thlai chinna ram-a lei (soil) te lak thin a ni a, chu chu mithiam ten a endikna hmun bik, Laboratory-a an endik hnuah an thil hmuh leh an thlai chinin a mamawh tur fertilizer te ziah lanna Card chu loneitute hnenah an pechhuak thin a ni, a ti.
Agriculture Director chuan he Scheme atang hian khaw pakhat tana an lei that dan din-hmun chhinchhiahna Map (Village Fertility map) siam tum a ni tih pawh sawiin, loneitute tan thil tangkai tak a nih ngei a beisei thu a sawi a. Laboratory-a lei endik (test) hi uluk taka tih ngai a nih avangin hun pawh a duh rei deuh thin tih lo hre lawk turin loneitute a chah a, lei hrisel takah thlai tam zawk an tharchhuah theih nan Soil Health Card-in a hrilh anga an huan leh lo te enkawl turin a fuih a. Agriculture Department-a lei endik tur lakhawm thin tute leh Laboratory-a lo endik thin tute pawh fimkhur leh dik taka thil ti thin tur te, lei endikna result dik leh rintlak chauh pechhuak thin turin a chah bawk.
Sawrkar laipui chuan loneitute hman tangkai theih turin February ni 19, 2015 khan Soil Health Card Scheme chu a lo hawng tawh a. Kum 2020 atang hian February ni 19 hi Soil Health Card Day atan a puang a ni. India ram pumah Soil Health Card hi vbc. 14 semchhuah tum a ni a, he Scheme hi Mizoram-ah pawh kum 2015 atang khan hman niin Soil Health Card 28,699 zet loneitute hnenah sem-chhuah a ni tawh bawk.

Comments

Chhiar Hlawhte