Zirtirtute sawn dan tur Dan thar pharh a ni

Mizoram sawrkar hnuaia zirtirtute an thawhna hmun hrehawm dan mila sawn kual thinna tur dan siamthatna chu nimin khan Assembly rorel inkhawmah pharh a ni.
Mizoram Education, (Transfer and Posting of School Teachers) Rules 2006 siamthatna, Amendment Rules 2020 hi nimin khan Assembly rorel inkhawmah School Education Minister, Lalchhandama Ralte chuan a pharh a, he Dan hmang hian Mizorama zirna In awmna hmun khaw hrang hrang te chu an awmna a kilkhawr dan azir zelin, hlawm 4, Schedule-I, II, III, leh IV ah te then a ni.
Schedule-I hnuaiah hian Aizawl leh Lunglei khaw chhungte dah niin, Schedule II atanga Schedule IV-ah te khaw hrang hrangte chu a kilkhawr dan mil zela rem chhoh an ni a. Schedule-IV hnuaia dah khaw hrang hrangah te zirtirtu chu kum 3 aia tlem lo an thawk ang a, Schedule-III ah kum 4 aia tlem lo, Schedule-II ah kum 5 aia tlem lo leh Schedule-I ah kum 6 chin an thawk ang a, an thawh mekna aia hmun nuam zawka insawn an duh chuan sawrkarah an dil a ngai ang a, an thawh mekna aia hmun nuam lo zawka ngaihah chuan an dil kher loh pawhin sawrkarin tul a tih chuan a sawn thei dawn a ni.
He Dan thar hnuaiah hian zirtirtu National Award leh State Award lo dawng tawhte chu duhsak bikna ruahman tel a ni a, natna khirh zual bik veite pawh a bik taka ngaihhnathiam theih dan siam tel a ni bawk a, chung natna chi hrang hrang te chu Rules-ah hian tarlan tel a ni bawk.

Comments

Chhiar Hlawhte