Mizoram State Day vawi 33-na lawmna Serchhip-ah District Bawrhsap hova neih a ni

Nimin February 20, 2020 hi State dinhmun-a Mizoram hlankaina Ni, Mizoram State Day vawi 33-na a ni a, he Ni hi Serchhip-ah pawh District Bawrhsap, Dr. Lalzirmawia Chhangte hova lawm niin Bawrhsap chuan State dinhmun-a min hlangkaitu Pathian hnena lawmthu sawi fo tur kan nih thu a sawi.

Kum 1966-a MNF ten zalenna suala Mizoram chu rambuai a nih hnuah June 30, 1986-a India sawrkar leh MNF-te'n inremna thuthlung an ziah hnuah Mizoram chu State puitlinga hlangkai turin ruahmanna siam a ni a; August 7, 1986-ah State puitlinga Mizoram hlankaina tur Bill chu Lok Sabha-ah pharh niin, an pass a, member 310 zinga 308-in an thlawp a. Rajya Sabha-ah pawh member 171 zinga 160 in thlawpin an pass leh a; August 14, 1986-ah India President-in hming a ziah hnan hnuah 53rd Constitution (Amendment) hnuaiah Mizoram chu India rama State 23-na a ni ta a, Feb. 20, 1987 khan khatih laia Prime Minister, Rajiv Gandhi chuan Aizawl-ah Mizoram State nih thu hi a puang a ni.

Serchhip DC’s Conference Hall-a Mizoram State Day lawmna puala inkhawm ah hian District Bawrhsap chuan Mizoram in State dinhmun a kan ram hlankai a nih hriatreng nan Feb. 20 chu State Day tiin Sawrkar Ni pawimawh ah puan a nih thu sawiin, State kan nihna champha kan lawm thei chu Pathian min hruaina a nih thu leh lawmawm a tih thu a sawi a. MNF leh India sawrkar inremna, Memorandum of Settlement chu ni 30.6.1986-ah ziah a nih thu sawiin, chu inremna-ah chuan Mizoram chu UT ni tawh lova, State puitling anih tawh tur thu tarlan niin, February 20, 1987-ah The Constiution (Fifty-Third Amendment) Act 1986 angin State puitling kan lo ta a ni, a ti a. State kan nih hnuah hlawkna tam tak kan nei a, Mizo thalaite zirna lama khawvel tukhverha an dahchhuah ve na tur Mizoram University kan nei te, Inrema thuthlungin chiang taka a tarlan angin chimral kan nih loh nana kan inhungbikna tur Inner Line Regulations hman a ni ta zel te hi thil chhinchhiah tlak tak anih thu a sawi bawk.

Serchhip District Bawrhsap chuan India ramchhunga sawrkar inrelbawlna kan neih san theih ber, State dinhmun-a Mizoram kan ding te chu a lawmawm tak meuh tih sawiin, India Constitution Framework chhungah hei aia din-hmun sang thil dang ropui zawk beisei theih kan neih loh thuleh he dinhmun a min hlangkaitu Pathian hnena lawmthu sawi fo tur kan nih thu a sawi a. State kan nih hian hamthatna tam tak a kentel rualin mawhphurhna tam tak a keng tel bawk tih sawiin, kan ramin hma a sawn zelna turin mipui ten mawh-phurhna hi puitling taka kan pawm leh kan hlenchhuah a tul thu a sawi a. Sawrkar chu mipuite tana mipuite siam, mipui rawngbawltu a nih thu sawiin, mipuite chu a neitu an nih thu a sawi a. Chuvangin mipuite pawhin sawrkar chu ral thlir mai lova a neitu rilru pu chunga sawrkar tawiawm tlat turin a sawm a, mipuite thlawpna lo chuan sawrkar tan thil tih hlawhtlin a har thu pawh sawiin, chuvangin sawrkar in a hnathawhna kawng hrang hrangah mipuite thlawpna a mamawh thu leh sawrkar hmalakna te a hlawhtlin theih nan thlawp zel turin a sawm nghal bawk.

Hei bakah hian District Bawrhsap chuan Mizoram State in kawng tinreng-a hma a sawn theih nan a chhunga cheng mi tin te kan pawi-mawh vek tih pawh sawiin, Dan rorelna (Rule of Law) ti nghet zel tur leh dan lova chetna laka inthiarfihlim zel turin mitin te rilru siamthar turin a sawm a, khua leh tui tha nih leh kan ram tana theihna sang ber theuh ti-a India ramah Mizoram chu dinhmun sang taka din tir tura mahni zawn theuha tha thawh turin a sawm bawk.

Nimin a Serchhip-a Mizoram State Day lawmna hi SDO (Sadar), C. Lalduhzuali chuan kaihruaiin Sawrkar Department hrang hrang atangin Group B leh a chunglam Officer tha-hnem tak an tel a, Samuel Zodinsanga, MCS, SDC chuan lawmthu sawina a nei bawk a ni.