Sawrkar Department hrang hrangte ram insemrual dan tur sawihona Serchhip-ah neih a ni

Nimin khan Serchhip-ah 'Serchhip District Level Authority on The Mizoram Government Land Pooling & Management Scheme' chu thukhawmin Serchhip District chhunga sawrkar ram enkawl dan tur an rel.
Serchhip DC Meeting Hall-a he thutkhawm hi Serchhip District Bawrhsap, Dr. Lalzirmawia Chhangte chuan kaihruaiin sawrkar department thenkhat ram nei zau tak, hmang tangkai silo an awm laiin, Department thenkhat ram mamawh em em, ram nei si lo te an lo awm thei bawk tih sawiin, “Sawrkar pakhat hnuai a mi vek kan nih si avangin heng Department hrang hrang ram te hi chhunkhawma, mamawh tawk ang zela hman tangkai dan thar sawrkar chuan a rawn duang a, State Level Authority leh District Level Authority te dinin; Vawiin ah a vawi khatna atan kan thukhawm ta a ni,” a ti a. District Level Authority hi Estate Management Cell, DC Office a din tur ten an puibawm dawn tih a sawi bawk.
He thutkhawm ah hian District Level Authority on The Mizoram Government Land Pooling & Management Scheme-a Member Secretary, C. Lalduhzuali, SDO (Sadar) chuan The Mizoram Government Land Pooling & Management Schemes chungchang leh District Level Authority te mawhphurhna a sawifiah a, District Land Revenue & Settlement Office atanga Department hrang hrang te ram neih dan an lo lakkhawm tawh chin te pawh report nghalin, hmun 53 a sawrkar ram pass an chhinchhiah tawh thu a sawi a, department thenkhat an hmunpui lama pass enkawl an awm nual avangin a la pung chho zel dawn a ni, a ti bawk.
He thutkhawm ah hian sawrkar Department hrang hrang aiawhte telin he Meeting hian Office hrang hrang te chu March ni 31 ralhmaa an ram neihte fel taka report hman turin a ti a ni.
Mizoram sawrkar chuan ni 14.09.2018 khan The Mizoram Government Land Pooling and Mangement Scheme hman chungchang hriattirna hi a lo tichhuak tawh a, ni 11.11.2019 ah tlema siam rem niin hemi ang hian Sawrkar department ram neite chuan an ram neih te chhin-chhiahna leh lehkha pawimawh awm ang angte chu State Level Government Land Authority ah an thehlut tur a ni a, mi ram hawh a Office luah te pawhin an luah chin te felfai taka ziak a thehluh tur a ni a. The Mizoram Government Land Pooling and Management Scheme in a tarlan dan chuan General Administrative Department ah Sawrkar department ram neilote chuan ram an neih loh thu an thlen tur a ni a, an mamawh dan a zirin Sawrkarin ruahmanna a siam sak dawn a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn