Zohnahthlakte Inpui kan nihna kan rilru leh mit timengtu nise a duh thu Speaker in a sawi

Mizoram Legislative Assembly Speaker, Lalrinliana Sailo chuan Mizoram-a cheng duhlian tawng hmangte hian Zohnahthlakte Inpui kan nihna hi kan rilru leh mit timengtu nise a duhthu a sawi.
Mizo Cultural Organisation (MCO) in an kum 25 tlinna, Silver Jubilee lawm paha nimin a Art & Culture Auditorium, Berawtlang, Aizawl-a General Assembly an neih a hmanpuina ah he thu hi sawiin Assembly Speaker chuan Zohnahthlak zawng zawngte kan thlazar hnuaia an len vek theihna turin ngaihtuahna kan sen a ngai tih a sawi a. Zohnahthlakte Culture leh tradition te chawi nun zel kawngah theihtawp chhuah zel turin MCO member te a ngen a. Duhlian tawng hmang ten Zohnahthlak hnam bil tawng hmangte kan ngai mikhual deuh hlek thin ni a a hriat thu sawiin, hei hi kan inpumkhatna daltu a ni thei a ni, a ti a. Hetiang rilru pu te chu sim hmak turin a chah a, kan hnam incheina kan ngaihhlut a tun aia kan chawisan lehzual theih chuan Zohnahthlakte min huikhawmtu tangkai tak a ni thei tih sawiin, Zofate inpumkhatna rilru a vei reng zel turin MCO member te a chah bawk.
Mizo Cultural Organisation (MCO) hi  February ni 13, 1993-ah Aizawl khawpui chhunga Cultural Club pasarih (7) kalkhawmin an din a ni a, Art & Culture Department chu Nodal Department-ah neiin tun dinhmunah hian Aizawl khawpui chhungah Branch/Club 66 an nei a, Sub-Headquarters pali - Kolasib, Champhai, Serchhip leh Mamit an nei a, hei bakah hian Group Headquarters pahnih Khawhai leh Chhawrtui-ah an nei bawk. Sub-Headquarters leh Group Headquarters zawm remchang lo thingtlang khaw engemawzatin direct in General Headquarters an zawm bawk a, nimin a an kum 25 tlin an lawmna hun hi Art & Culture Department Director, R. Hmingthanzuala pawhin khual zahawm niin a hmanpui bawk a ni.
Mizo Cultural Organisation hian a tum ber chu Mizo hnam ziarang humhalh te, Mizo hnam zai leh lam te humhalh a tihhmasawn te, thangthar lo awm zel te hnena zirtir chhawn te leh hnam inpumkhatna vawn nun te a ni a. Mizo hnam ziarang chi hrang hrang te lam leh zai hmangin an phochhuak thin a, Tourism Department nen pawh thawkhovin India ram hmun hrang hrangah Cultural Troupe an tirchhuak thin bawk a ni.

Comments

Chhiar Hlawhte