Assembly Session neih mekah Supplementary Demand for Grants chu sawiho hnuah pawm a ni

Mizoram Legislative Assembly Budget Session neih mekah nimin khan kum 2019-2020 chhunga sawrkar pawisa indaihlohna phuhrukna tur, Supplementary Demand for Grants Rs. 3398,12,71,000/- chu sawiho a nih hnuah lungrual taka pass a ni.

Supplementary Demand for Grants hi Budget Session hmasa-a House in a pass tel loh, sawrkar sum hman tur leh hman tawhte chinfelna a ni a, Rs. 3398,12,71,000/- bakah hian House in a pass kher ngai lo chi-a sawrkarin sum a hman, Charged tia sawi Rs. 76,03,47,000/- chu kum 2019-20 chhung hian a awm bawk a. Supplementary Demand for Grants hi Chief Minister aiawhin Dy Chief Minister, Tawnluia'n Assembly House-ah pawmpui turin a pharh a, thu zawhfiah duh neite tana hun a hawn-ah Congress member, C. Ngunlianchunga chuan District Council Affairs Department in District Council te tana sum a pek belh, Grants in Aid, Non-Salary ah LADC chu State Finance Commission rawtna angin cheng nuai 50 pek belh a ni a, MADC in cheng khat mah an dawng lo a, Chakma Autonomous District Council erawh chu cheng nuai 500 ngawt pek belh a ni tih a sawi a, hei hi CADC-ah MNF sawrkar a din vang a ni em tih a zawt a, Tawnluia hian, CADC hian an indaihlohna sawrkar ah an thlen a, Chief Minister remtihnaa pek an ni tih a sawi a, District Council dang pahnihten an mamawh an thlen ve em tih chu a chhang thei lo tih House a hrilh a ni.

Opposition Group Leader, Lalduhoma chuan sawiho mumal lova Supplementary Demand for Grants pass a ni mai thin chu tha lo a tih thu a sawi a, Budget sawiho anih laia pass bak cheng vbc. sang 3398 chuang sawrkarin Legislator te hriatpui loha a hmang chu a tam lutuk deuh a ni, a ti a, Department thenkhat cheng nuai sing chuang lai Assembly in a pass bak hmang te pawh an awm a, House a sawiho mumal lova sum tam tak pass mai thin anih chuan sum enkawl kawngah sawrkar a fimkhur thei dawnin a lang lo a ni, a ti.

Dy. Chief Minister chuan Supplementary Demands for Grants hmanga pawisa siamrem tur chhawp chhuah zingah hian Centrally Sponsored Scheme, North East Area fund leh NLCPR atanga sum hmuh cheng vbc 1575.96 a tel tih a sawi a, hei bakah hian Externally Aided Project leh NABARD atanga hmuh cheng vbc 275.83 a awm bawk tih a sawi a, Mizoram sawrkarin budget-a pass bak, inrelbawlna leh a kaihhnawiha sum a hman belh cheng vbc 1622.37 a ni tih a sawi bawk.