Home Minister thu sawi an hriat dan nen inmillo

West Lungdar VC leh NGO te chuan tun thla ni 24-a West Lungdar-a mipa naupang kum 13 mi, hnamdang pathum in Motor a an phur leh a hnua thil thleng chungchanga Home Minister in Assembly Session-a a sawi zingah an thil hriat dan nena inkalh a awm nia an hriat thu an sawi.
Hemi chungchanga nimin a thuchhuah an siamah West Lungdar VC leh NGO chuan nimin (Feb. 28, 2020) zing khan heng hnamdang pathumte thlenna nia sawi, Hotel Leela, Thuampui hi tlawhin a thawktute chuan heng mi pathum, West Lung-dar naupang in amah rubote nia a sawite thlalak hi Hotel nghaktu hi entir niin, heng mite hian February ni 19, 2020 (Nilaini) khan an Hotel-ah hian an inziaklut ngei niin a lo hrilh tih an sawi.
Hotel-a an inziahluh danah Rahul-a hming-a Room hi lak a nih thu leh an pathum hian Room khat-ah an riak ho tih pawh tarlangin, an inziahluh hun hi Feb. 19, 2020 dar 8:00PM a nih thu leh February ni 24, 2020-ah hian Rahul-a hming thoin Hotel hi booked leh niin a Phone No. pawh a ngai chiah niin a Address erawh a dang-lam thu an sawi a. Hei vang hian Feb. 24-a Vai-rengte Police Check Gate-a inziaklut anga sawi chu rin thiam har an tih thu an sawi bawk.
He thil thlen dan pawh sawi nawn lehin Feb. 24-ah naupang hi rukbo tum a nih thu leh kawnglak atanga tlanchhuakin he naupang hian a pa hnenah a hrilh a, Motor hmanga umzui an nih thu an sawi a. Khawrihnim mipui ten mi 3 te chu lo manin naupang hi an entir hnuah an nih loh thu sawiin chhuahtir leh nghal a nih thu an sawi a. Feb. 25-ah South Sabual-ah midang 3 te man lehin West Lungdar-a awm naupang hi a thlalak entir a ni a. Naupang hian heng mi pathum zinga a te berin motor a khalh tih a sawi avang leh an thlalak a en-in anmahni ngei a ni tih a sawi avangin misual ngeiah ngaih an ni ta tih an sawi bawk.

Comments

Chhiar Hlawhte