Conclave-ah Mizoram CM tel

Ni thum (3) awh tur ‘Sustainable Development Goals (SDG) Conclave 2020: Partnerships, Cooperation and Development of North Eastern States’ chu niminpiah tlai khan neih tan niin Chief Minister, Zoramthanga chuan he hun hi a hmanpui a ni.
NITI Aayog buatsaiha Assam Administrative Staff College, Guwahati-a he hun hman ah hian Chief Minister, Zoramthanga chuan Sustainable Development Goals thiltum te chu Mizoram leh hmarchhak state te tan pawi-mawh tak nia a hriat thu sawiin, Mizoram-ah pawh hmasawnna changtlung leh entawntlak siam turin state sawrkarin hma a lak dan a sawi a. Hmasawnna kan mamawh rualin kan chenna leilung, thing leh mau, ramngaw leh nungcha tichereu lo zawnga hmalak a tul thu a sawiin, Mizoram chuan sik leh sa nuam tawk, ruahtui duhthusam leh thlai chi hrang hrang that duhna leilung a nei tih a sawi a, chu chu kan thil neih hlu ber a ni, a ti bawk.
Chief Minister, Zoramthanga chuan sawrkar laipuiin state pariat-te dinhmun a hriat chianpui a, an puihna a pawimawh thu sawiin, hmarchhak state pariat te hmasawnna hna thawhna tur 10% Gross Budgetary Support dah thin chu kimchang taka hmuh a nih a, tangkai thei ang bera hman chungchang te, NEC tichak zual tura Secretariat thuamthat leh NEC leh DoNER hna-thawh tur felfai taka thliar a pawimawh thu a sawi a. Externally Aided Project funding pattern pawh state in a tum ve tur 10% ni thin kha tihpun a nih tak avanga hmarchhak State te tan phur a rit phah tak thu leh, a hma ami anga State Share chu dah let leh a tul thu te a sawi bawk.
He Conclave Technical Session-ah hian hmarchhak State-a Sustainable Development Goals kalpui dan te, economy hausakna leh eizawnna ngelnghet siam te, sik leh sa inthlak mil a kuthna-thawktute eizawnna kalphung her danglam te, hriselna chungchang leh adangte sawiho a ni ang.

Comments

Chhiar Hlawhte