Ministry of External Affairs in Border Pass pek tum

Mizoram mi, a bikin Myanmar ramchhung Mel 16 thlenga kal theite tan Ministry of External Affairs chuan ramri kan-a Myanmar luh phalna (border pass) pek chhuah thuai a tum.
Ministry of Home Affairs huaihawta kar kaltaa ramri a intlawhpawh dan (free movement regime) chungchang sawihonaah Mizoram lam atanga Myanmar a luh dan siamfel nise tih an rel a, Rih Dil thleng vela kal theihna atan border pass siam ni se, chutiang phalna chu Ministry of External Affairs in lo buaipui se an ti a. He inhmuhkhawmna a tel sawrkar Official chuan border pass hi siam thuai a nih tur thu a sawi a. Hemi atan hian internet hmangin ruahmanna siam a ni anga, Myanmar luh phalna neite chu an phalna nambar nen phone-ah pawh en theih leh endiktute entir mai theih turin portal siam a ni ang a. Rih Dil thlenga zinna tur lirthei ruahman tum a ni bawk a ni.
He inhmuhkhawmna-ah hian China siam lirthei ke hnih nei Kenbo, Mizoram chhunga tlan reng reng chu man vek turin Mizoram sawrkar hriattir a ni a. Myanmar-a awmte'n One-two-fai an tih mai, he lirthei ke pahnih nei hi an uar hle a, ramri tawn tawnah mi tam takin an hmang a ni. Sawrkar laipui chuan hetiang lirthei hi Customs duty engmah pe lova lakluh a nih avangin dan kalh a ni tiin man khawm turin thu a pe a. Hei bakah hian Asia chhim lam ramte atanga Mizoram kaltlanga kuhva rah lo lut thin chu man zel turin Mizoram Police te hnenah thupek a ni a. Hemi rual hian India ram atanga leitha Myan-mar a phurhluh turte chu lo man zel tura thupek a ni bawk a. Assam Rifles te chu ramri atanga KM 16 chinah lo man tur leh an thil mante chu Police leh Customs thuneitute hnena hlan tura hriattir an ni.
Sawrkar laipui chuan leitha (chemical fertilizer) hi State hrang hranga kuthnathawktute hman tura sawrkarin sum tam tak senga a tihhniam sak bakah duh duha hralhchhuah mai mai khap thil a nih avangin Myanmara a hralh hi a khap a. Hetianga Myanmar lama hralh a nih hian kuthnathawktute'n an chanpual tur an chan loh bakah India sawrkar tan hekna a nih thu an sawi a ni.

Comments

Chhiar Hlawhte