Myanmar atanga Mizoram-a bungraw lut thin ah Dan angin Chhiah lak theih a ni rihlo

Taxation Department changtu Minister, Lalchamliana chuan Dan hnuaia ram pahnih insum-dawntawnna mumal tak la awm loh avangin Myanmar atanga Mizoram-a bungraw lut thin ah chhiah lak theih a ni rih loh tih a sawi.
Nimin a Mizoram Legislative Assembly Budget Session zawhna leh chhanna huna Member te zawhna kal zelah eptu Member, C. Lalsawivunga zawhbelhna, “Myanmar atanga bungraw lo lutah te hian Tax lak a ni em? Lak a nih chuan eng Tax nge lak a nih? Bungraw ngai si ah Chhiah pek nawn ngai te pawh a awm niin a lang a, helai hi min enzui sak thei ang em?’ tih te chu chhangin Taxation Minister, Lalchamliana chuan mumal taka insumdawntawnna a la awm loh avangin Myanmar atanga bungraw lo lutah te Chhiah lak a la ni lo tih a sawi a. Central Customs hian Zokhawthar-ah te, Seling-ah te pawh pawisa an lo khawn thin a, hei pawh hi dan a ni chiah lo, a ti bawk.
Eptu member, Serchhip bialtu MLA, Lalduhoma leh Eptu member Aizawl North-II bialtu MLA, Dr. Vanlalthlana te zawhna intawm, ‘Mizoram-ah engtik atangin nge GST lak a nih, kum 2017 hma lama Work Order pek tawh hna la zo lo te hnen atangin GST hi lak ve tho a ni em?’ tih leh ‘GST hman hmaa Contract/Work Order pekchhuah ah GST hi a lak loh theih em?’ tih te chu Taxation changtu Minister, Lalchamliana chuan chhangin, July ni 1, 2017 atangin Mizoram-ah GST lak tan a ni tih a sawi a, “Kum 2017 hma lama Work Order pek tawh GST hman a nih hnua hna la zo lo te hnen atangin the Mizoram Goods and Services Tax Act, 2017 in a sawi angin GST lak a ni,” a ti. GST hman hmaa Contract/Work Order pekchhuahah pawh GST hman a nih hnuah chuan The Mizoram GST Act, 2017 in a sawi angin Chhiah hi lak tur a ni tih Taxation Minister chuan sawiin, Mizoram Value Added Tax Act, 2005 hman hunlaia Works Contract Agreement an lo siam tawh a nih pawhin July ni 1, 2017 hnu lamah hna an la zo hman lo a nih chuan The Mizoram GST Act, 2017 in a sawi angin VAT ni lovin, GST zawk lak tawh tur a ni a, hei hi GST Dan section 142 (10) ah a inziak a ni, a ti bawk.
Zawhna neitu Dr. Vanlalthlana zawhbelhna, ‘GST hman a nih hmaa Contract/Work Order pekchhuahte kha VAT 4% pek tur te hre chunga sum ruahman fel tawh te an ni a, GST hman in a nan chhoh takah chuan GST 12% an pek a lo ngai ta si a, hna lamin a tawrh phah theihna lai te a awm a, helai hi siamrem dan a awm thei em?’ tih chu Taxation Minister chuan, “Ka hriat sual loh chuan VAT kha contractor hnen atangin 13.5% lak thin a ni a, GST hi 12% a ni thung,” a ti a. Contractor te hian an hna ngaipawimawh sela chuan tha takin an thawk thei ang a, hlep chu an nei thei tho awm ang e, kan ti a ni, a ti bawk.

Comments

Chhiar Hlawhte