Mizoram Rajya Sabha MP-in Zoram Medical College (ZMC) buaina chungchang sawipui

Rajya Sabha MP, Ronald Sapa Tlau chuan Zoram Medical College (ZMC) Director, Dr. Lallukhuma Fimate ngenna angin Thawhlehni kalta khan Medical Council of India (MCI) Office-ah tunlaia ZMC buaina lian tak tawn mek chungchangah MCI Secretary General, Dr. RV. Vats a lenchilh.

Tunhnaia MCI Inspection Team in ZMC an endiknaah ZMC-a Associate Professor 10 (Dr. Vanlalhlua, Dr. John Lalliandinga, Dr. Vanremmawii, Dr. Lalrinfela, Dr. Lalnunmawii Sailo, Dr. PC Lalramenga, Dr. Vanlalhruaii, Dr. Wendy L Ralte, Dr. Zorinsangi Varte leh Dr. F. Elizabeth Lalhmangaihzuali) lakte chu qualify lo chunga lak niin MCI-ah hian report a ni a. He report sawi dan hi chuan heng mi 10 te hi ban nghal an ngai dawn tihna a ni a.

Hemi chungchangah hian Rajya Sabha MP, Ronald Sapa Tlau chuan MCI Inspection Team in ZMC an endik laia Associate Professor te lakdan an sawiselna (heng Associate Professor te hi Asst. Professor dinhmun chelh hmasa lovin Associate Professor ah an direct thiang lo) tih chungchanga ZMC hotuten insawifiahna chu engahmah an ngaihsak loh thu leh central sawrkar Gazzette chhuah Dt. January 23, 2018-a phek 5-na Clause (ii) ah ngaihhnathiamna (Asst. Professor ni hmasa lo mahse, State Hospital-a kum 10 an lo thawh tawh phawt chuan Associate Professor ah lak theih an ni ang) tih chiang taka ziak awm chu Dr. Vats hmaah chhawpchhuakin, hemi avanga heng mi 10 hi ban lo tur leh hetiang hleih nei taka hmalak ching MCI Inspecting Team chimawm deuh hi ZMC leh Medical College dang pawh a chhan tha awm lova tibuai tawh lo tura hma la nghal tura a hrilh chu MCI Secretary General, Dr. RK Vats chuan lo ngai pawimawhin, heng mi 10 te hi ban an nih loh tur thu leh thlamuang taka lo thawk zawm tura hrilh nghal turin ZMC Director Dr. Fimate chu a hrilh a ni.

Rajya Sabha MP hi Mizoram atanga he thil buaipui tura Delhi-a kal, ZMC Director Dr. Fimate, Health Secretary GoM H. Lalengmawia IAS leh Dr. Lalrinfela, Associate Professor, ZMC leh Dr. Hmingthankimi, OSD New Delhi, Deptt. of Health & FW, GoM ten an tawiawm a ni.