Council of Minister thukhawm

Sawrkar department thenkhat atanga thu pawimawh ngaihtuah ngaite sawiho in Zirtawpni khan Chief Minister, Zoramthanga hovin CM Office Cabinet Meeting Room-ah Council of Minister te an thukhawm.
Council of Minister thukhawm hian Mizoram sawrkar hnuaia Muster Roll te chungchang sawiin, anmahni enkawl dan tur rawtna lut chu pawm a ni a. Hemi hnuaiah hian Muster Roll te chu Provisional Employee tia thlak an ni anga. Minimum Wages Act hnuaia hlawh la thin kha Pay Structure hran neiin felfai takin an thlatin hlawh (renumeration) tur pawh siam a ni ang. An hlawh hi kumtin basic pay atangin 4% a tihpun (annual increment) a ni tawh anga. Hemi bakah hian Travelling Allowances/Daily Allowance leh transfer TA an bill thei dawn bawk a ni.
Provisional Employee te hian Medical Allowance 4% in an hlawh ah an dawng tel tawh dawn bawk a. Hmeichhe tan fa pahnih aia tamlo ah Maternity Leave kar 26 chhung an la thei ang a. Mipa tan Paternity Leave ni 7 chhung lak theih a ni dawn bawk a ni. Provisional employees te hian department a Group ‘C’ leh Group ‘D’ hna awm sa te thawkin, an tan post hran siam sak a ni dawnlo a. Kum khat (calendar year) zelah Casual Leave ni 4 an nei tawh ang a, hemi bakah hian an ruaitute nena inremsiamna in thla tin ni khat chawlh (compulsory non-duty) an nei thei dawn bawk a. Provisional employee te enkawl dan tur kaihhruaina hi sawrkar in Cabinet thu a pass ang hian hriattirna tihchhuah thuai tur a ni ang.
Council of Minister thukhawm hian sawrkar hnathawk zinga lirthei kawl thei chin tur Vehicle Entitlement siamthatna chu enhovin an pawm bawk a. Power & Electricity leh Public Health Engineering department te mipui rawngbawl hna tha zawka hna an thawh theihna tura hma la turin heng department pahnih ah hian Task Force din chu pawm a ni bawk.

Comments

Chhiar Hlawhte