Dr. R. Lalthangliana’n sawrkar laipui hotute a kawm

New Delhi a cham mek Minister, Dr. R. Lalthangliana chuan Zirtawpni zan khan World Bank Officials pawimawh te nen World Bank Office ah inkawmna an nei a, January 7, 2020-a World Bank Headquarters, USA-a thuneitu sangte hnena a thlen bawhzuiin, Mizoram a Health Project lian tham kalpui dan tur a sawipui a. Mizoram a College hrang hrang leh Polytechnic hrang hrang tihchangtlunna tur atan thawhho dan tur leh hmalak dan tur an sawiho bawk.

Higher & Technical Education Minister ni bawk, Dr. R. Lalthangliana hian GS Hosur, Jt. Secretary (HE-Univ.), Ministry of HRD pawh hmuin tunhnaia Mizoram University, Southern Campus din phalna Ministry of HRD in a pek avanga lawmthu a hrilh a. Minister hian Mizoram University (SC) hmun tur tuna zawn mek anih thu hrilhin, hmuh anih veleh a Campus dinna (building infrastructure) atana sum mamawh te Ministry in theihtawp chhuaha pek theih an inbeisei thu an lo hrilh a. Santosh Mall, Commissioner leh Technical Officials, Kendriya Vidyalaya Sanganathan te nen inkawmhona neiin Mizoram-a KV Lunglei hmalakna kal mel chungchang an sawiho a, a hlawhtlin theih nan theihtawp chhuah an tum thu an lo hrilh a ni.
Dr. R. Lalthangliana hian UNAIDS-a Country Director, Bilali Camara leh officials dangte pawh kawmin, kumin January thla a USA a UNAIDS International Office hotute nen an lo inhmuhtawhna chungchang ah hmalak chhunzawm zel dan tur an sawiho a. US sawrkar-ah an lo thlen tawh thu lo hrilhin, Mizoram a HIV AIDS dona leh tihtlemna kawnga thawhho dan tur kawng hrang hrang an sawiho bawk.
Hemi hnu hian Ministry of Tribal Affairs-ah Joint Secretary pahnih- Naval Jit Kapoor leh M.R. Tshering-i te nen meeting nei lehin Zoram Medical College a mipa leh hmeichhe Hostel sakna tur chungchang te, Special Central Assistance to Tribal Sub-Scheme hnuaia Mizoram in project kan hmuh theih dan tur an lo hriattir a. Ministry of Tribal Afairs hnuaia Schemes hrang hrang awm te tangkai taka hman theih dan tur an lo kawhhmuh bawk.
Heng bakah hian Ministry of HRD, Jt. Secretary (RUSA) Kamini Chauhan Ratan chu RUSA-2 hnuaia hmalakna chi hrang hrangte a sawipui leh a. Jt.Secretary hian RUSA-2 hi kum 2021, March 31 thleng pawhsei anih thu Minister hi lo hrilh a. Preeti Sudan, Secretary, Ministry of Health & Family Welfare hmu leh in Mizoram a RIPANS tihchangtlunna tur atana nikum February thla tawp a cheng vbc. 480 zet mai sanction awm tawh vawiin thlenga hmalakna chawk tawklo chu a ngaimawh thu Minister hian a thlen bawk a ni.

Comments

Chhiar Hlawhte