ILP fello mi 11 District Court-ah hruai an ni

Serchhip Police leh Serchhip Sub-Hqrs. YMA Kumpuan Committee hmalakna in nizan hmasa khan Serchhip khawpui chhungah hnam-dang dan lova awm te enfiah hna thawh niin dan lova awm mi 11 te chu nimin khan Serchhip Court-ah hruai an ni.

Serchhip Police te leh Serchhip Sub-Hqrs. Kumpuan Committee te hian nizan hmasa khan Serchhip khawpui chhunga YMA Branch Area hrang hrangah Mizoram-a hnam-dang awm te enfiah hna hi thawkin hnamdang phalna nei lova awm leh phalna an neih hmang diklo te an enfiah a, he hunah hian mi 22 te chu Serchhip Thana-ah hruai niin heng te hi enfiah nawn leh an nih hnuah an zinga mi 11 te chu ILP neilo leh fello an ni tih finfiah niin Section 3 of BEFR Act 1873 hnuaiah thubuai siam sak an ni a, heng mite hi nimin vek khan Serchhip District Court-ah hruai nghal an ni.

Serchhip Sub-Hqrs. YMA hruaitute chuan Mizoram-a hnamdang rawn lut tam tak hian ruihhlo an rawn kenluh thin avangin fimkhur thar a tul an tih thu sawiin, Mizote zingah an hna thawk tur ni miah lova hnamdang lo sponsor thin an awm chu pawi an tih thu leh hetiang hi hnam hralhna a nih avangin thleng tawhlo se an duh thu an sawi a. Tualchhung-a Politician leh mi langsar leh challang tak tak zingah fello taka hnamdang lo ruai leh hemi chungchanga YMA leh Police te hmalakna kalh zawnga lo che thin an awm chu thalo an tih thu an sawi a. Mamawhna avanga hnamdang ruai tur an awm a nih pawhin Dan angin fel takin hmalak tha an tih thu an sawi bawk.