MJA Member te hriselna a thlawnin enfiah sak

Civil Hospital Aizawl-in Mizoram Journalists' Association (MJA) General Hqrs. member te tana a thlawna an hriselna enfiahna hun a buatsaih tur chu nimin khan Health & Family Welfare Minister, Dr. R. Lalthangliana'n a hawng.
Civil Hospital Aizawl Doctors' Seminar Room-a inkhawm buatsaihah Health Minister chuan hriselna ngai-pawimawha hetiang hun MJA leh Civil Hospital Aizawl ten an nei chu thil tha leh Health Awareness lama mipuite pawh tithangharhtu tur a nih a rin thu a sawi a. Tuna kum khat dan-a tih chu kumtin neih tura ruahman tha a tih thu sawiin, MJA awmna District dang zawngah pawh Free Health Checkup hi nei vek turin Directorate lamin hma lo la se rah tha tak a chhuah a beisei thua sawi bawk.
Health Minister chuan Civil Hospital Aizawl chu a awmna laili avangin pan hlawh ber a nih thu leh tihchangtlun erawh a ngai dawn tih sawiin, Trauma Centre dinna tur sawrkarin cheng vbc. 5 a dah tawh thu leh a tul dan azirin dah belh zel a nih tur thu a sawi a. Hospital ram tlaklam awl chu Doctor, Nurse leh IV-Grade awmna tur Quarters sakna atan ngaihtuah a ni dawn tih a sawi a. ICU tlem lutuk chu tihbelh dan tur dap a nih thu te, Zemabawk Cancer Hospital-a inhemna khawl kum 20 a upa ni tawh chu Chief Minister hmalakna in cheng vbc. 14 in khawl thar lei tum mek a nih thu leh a dahna tur hmun pawh thawmthat a nih thu te, Cancer Speciality Hospital din tura ruahman fel a nih tawh thu leh RIPANS tihchangtlunna tur vbc. 480 tihfel a nih tawh thute a sawi bawk
He hunah hian MJA President, Zonunsanga Khiangte chuan journalist tha ni turin hrisel a ngai tih sawiin, chumi atana Civil Hospital Aizawl in duhsak taka Health Checkup an neihsak thin chu lawmawm a tih thu a sawi bawk.

Comments

Chhiar Hlawhte