Raw Project lian tak kalpui a ni dawn tih Chief Minister in Assembly House-ah a sawi

Chief Minister, Zoramthanga chuan Raw Project lian tak an kalpui dawn tih nimin a Assembly Inkhawm ah sawiin, Sawrkarin Raw lian chi chin pun a tum chu zirchianna research neih ni lo mahse, Mizoram leilung, boruak leh sum leh pai lama hlawkna thlentu tur a ni, a ti.

Nimin a Mizoram Legislative Assembly inkhawm chhunzawm-ah MNF Member, Dr. ZR. Thiamsanga zawhna kalzelah Mizoram-a Mau chungchanga Research tih a nih loh chhan sawifiahin Chief Minister chuan, Mau zirchiana chu Bamboo Centre lamah kalpui niin hmasawn lutuk a nih loh thu a sawi a, “Mi tam takin Research an ti tawh a, chung Research an tih tawh en chungin, keini'n Centre a hrana din-a tih leh vak tul kan ti lo,” a ti a. Environment lam atana Mau a thatna chungchangah Raw Project kalpui a nih hun chuan Mau leh Raw (Rua) awm sa vat a, a aia tha zawk phun tum a nih avangin a awmsa engemawzat tihchhiat a ngai dawn tih sawiin, “A aia tha zawka thlak tur a nih avangin a in compensate turah kan ngai,” a ti a, Mizoram-a mau te chu te reuh te te a nih avangin a karah hnim a to tam a, a kang duh a, Raw lian hmun chu sang pui pui, lian pui pui ding thelh thulh anih avangin a karah hnim kang tur a to tak tak thei lo a, a hnah tla lei-a inchap darh chu a lo kang palh anih pawhin nasa takin a kang thei lo a ni, a ti a, Raw chin chu ramkang venna kawngah pawh a tha ber pakhat nia an hriat thu a sawi bawk.
Chief Minister chuan Mau chu June thla velah a tuai a lo chhuak tih pawh sawiin, “Thla ruk hnu velah a nu chenin a thang hman a, thla 6-a a nu tiat thing a tlem hle a ni,” a ti a, thla ruka nu te tiat turin Carbon dioxide tam tak hiplutin Oxygen tam tak a pechhuak a, Oxygen a pekchhuah chu thing pangngai let 4/5 vel a ni, a ti a. Raw ngaw a awm khup chuan tui humhalhna kawng tha ber zinga mi a ni bawk a, sum leh paiah pawh Raw lian chi chu a hlawk bik em em dawn a ni, a ti.
Chief Minister hian Raw chin beihpui thlakna tur hian Delhi lamah project pui tih an tum thu leh min pek an tum thu pawh sawiin, Central sawrkar pawhin a phurpui avangin cheng vbc. 100 vel lakchhuah theih an inrin thu a sawi a. Hemi atan hian kan State Budget chu hman a ngai lo tih a sawi bawk.

Comments

Chhiar Hlawhte