VC te Panchayati Raj-a let turin ruahman

Local Administration Department changtu Minister, K. Lalrinliana chuan LAD hnuaia Village Council te chu India Danpui siamthat 73-na zulzuiin Panchayati Raj-a let turin Department chhungah ruahmanna a awm tih a sawi.
Nimin a Assembly Session zawhna leh chhanna hunah Congress Member, Zodintluanga chuan ‘LAD hnuaia Village Council te chu India Danpui siamthat 73-na zulzuiin Panchayati Raj a leh tumna a awm em?’ tih a zawhna chhanga he thu hi sawiin LAD Minister, K. Lalrinliana chuan, “Department chhungah chuan ruahmanna a awm a, hemi atan hian Drafting Committee dinin, State dangte dinhmun pawh zirchian a ni a, thutlukna erawh a la awm lo,” a ti a. Tuna Village Council hman laiah hian siamthat ngai lai tam tak a awm tih sawiin, “Tuna thingtlang inrelbawlna leh sawrkarna hi tihchaka, thuneihna tam zawk peka Development hna kalpui dan a felfai zawkna tura tih a ni,” a ti a. Drafting Committee hi vawi 6 inhmukhawm tawhin Concept Note pawh an peihfel tawh tih sawiin, “Political party aiawh leh tlawmngai pawl aiawhte nen pawh inrawnkhawm tawhin, Panchayati Raj Institution hmang State - Sikkim leh Tripura te zirchian tawh a ni a, kan anpui State - Pachayati Raj Institution-in a huam ve loh Nagaland leh Meghalaya te pawh zirchian tawh a ni,” a ti. Minister chuan hemi chungchang hi Cabinet-in vawikhat an sawiho tawh thu pawh sawiin, tun atan chuan a ngai anga kal rih phawta, Village Council inthlan zawh hnu lamah uluk taka en that ni se tih a nih thu a sawi bawk.

Comments

Chhiar Hlawhte