Kum 2019-2020 chhungin Mizoram kawng siam nan cheng nuai 42684.48 hman a ni tawh

PWD changtu Chief Minister Zoramthanga chuan kum 2019-2020 chhungin kawng siam nan cheng nuai 42684.48 hman a ni tawh tih sawiin, hei hi State Fund atangin cheng nuai 26595.80 leh Central Fund atangin cheng nuai 16088.68 a ni, a ti.

Mizoram Legislative Assembly Budget Session nimin-a chhunzawm ah Member Lalchhuanthanga zawhna chhangin PWD changtu Chief Minister Zoramthanga chuan kum 2017-2018 Financial year chhungin Mizoram sawrkar-in kawng siam nana sum a hman zat chu State Fund atangin cheng nuai 61695.24 leh Central Fund atangin cheng nuai 26067.86, a vaiin cheng nuai 87463.10 a ni a. Kum 2018 - 2019 Financial Year chhungin Mizoram sawrkar-in kawng siam nana sum a hman zat chu State Fund atangin cheng nuai 60449.75 leh Central Fund atangin cheng nuai 15703.47, a vaiin cheng nuai 76153.22 a ni, tih a sawi a. Kum 2019-2020 chhungin State Fund atangin cheng nuai 26595.80 leh Central Fund atangin cheng nuai 16088.68, a vaiin cheng nuai 42684.48 hman a nih thu a sawi bawk.

Chief Minister chuan eptu member Nihar Kanti Chakma zawhna pawh chhangin Khawthlang Tuipui-ah Lei (Bridge) siam tumna PWD atang chuan a awm loh thu a sawi a. Lalrintluanga Sailo zawhna pawh chhangin Marapara Mizo Veng to Marapara North kawng chu a rang thei ang bera siam tum a nih thu a sawi a, Dapchhuah to West Phaileng kawng chu Border Roads Task Force (BRTF) kawng enkawl a ni a. PWD chuan midang kawng enkawlna ah kut a thlak a remloh avangin Dapchhuah to West Phaileng kawng enkawlah PWD chuan hmalak tumna a neih loh thu a sawi bawk.

Eptu member Lalduhoma zawhna chhangin PWD changtu Chief Minister chuan, “Bawngkawn leh Vaivakawn junction-a flyover ruahmanna turin Ministry of Housing & Urban Affairs-ah proposal thehluh a ni a. Ministry hian CPWD Engineer-te rawn tirhin an rawn endik a. A dawh theih (Feasible) thu an rawn report hnuah Ministry hian 'in principal approval' min pe a. Techno Feasibility report siamna turin sum an ruahman thu pawh dawn a ni a. Techno Feasibility Report kimchang tak Geo Technical report nena ruahman a ngaih avangin hun a duh deuh a, report hi buatsaih mek a ni,” a ti bawk.

Chief Minister, Zoramthanga chuan kawng siam lamah theihtawp an chhuah thu sawiin, “Kan buaina ber chu ruahtui a tla rei lutuk a, hna kan thawk tan a, rin aiin ruahtui a tam leh thin,” a ti a, chak taka kawng siam hna thawhzel an tum thu a sawi bawk.