Serchhip-ah 'Innovative Challenge on Business Solution to Sustainable Development Goals' neih a ni

Entrepreneurship Development Centre (EDC) Mizoram leh Planning & Programme Implementation Department, Govt. of Mizoram tangkawp buatsaih, 'Innovative Challenge on Business Solution to Sustainable Development Goals' chu nimin khan Govt. Serchhip College-ah neih niin Adviser to Chief Minister, C. Lalramzauva chuan khuallian niin a hmanpui.

Govt. Serchhip College HD Rosanga Multipurpose Hall-a 'Innovative Challenge on Business Solution to Sustainable Development Goals' ah hian Adviser to Chief Minister, C. Lalramzauva chuan kan ram hi tha tak leh tangkai taka kan hman tura Pathian in min duan sak a nih thu sawiin, ram mipuite hmasawnna ngaihtuah chu sawrkar pawhin a tum ber a ni, a ti a. Sustainable Development Goals (SDG) in Goals pawimawh tak tak 17 chhawpchhuahte hmanga hmasawnna kawng hrang hrangah tanrualna nen hnathawh chhoh a hun takzet thu sawiin, College zirlaite chu Entrepreneur lamah Zirna, Agriculture, Sport, Industries leh a dangte ah hmasawnna tur kawng tam tak a awm thu leh chungah te chuan thil thar hmuchhuak tur a fuihin, Mizote chu hnamdang laka kan chungchuan bikna kawng hrang hrangte a sawi a, mithiamten kan ramah hmasawnna ngelnghet a lo awm zel theihna tura an zirtirna chu hlawk taka hmang turin duhsakna a hlan bawk.
Nimin-a 'Innovative Challenge on Business Solution to Sustainable Development Goals' hman hi Govt. Serchhip College Principal, Lalremsiama chuan kaihruaiin Lalchhuanawma Hrahsel, Chief Consultant, SDG chuan Sustainable Development Goals tobul sawiin, khawvel ram hrang hranga hmasawnna hnathawh kalpui avanga kan sik leh sa leh khawvel lo la awm zel tur (Future Generation) ten an tawrh theih dan te sawiin, chutiang ang zawng ni lova hmasawnna ngelnghet leh tlo tak tak a lo awm zel theih zawkna tura SDG 17 Goals in a tum hrang hrang sawiin, Entrepreneurship Development Centre (EDC) Mizoram Co-ordinator, Truth Chuauthangpuii hnen atangin EDS Presentation ngaihthlak a ni bawk.
Vawiin-a zawhfel tur 'Innovative Challenge on Business Solution to Sustainable Development Goals' ah hian Serchhip District chhunga khaw hrang hranga eizawnna lama har-satna awm thei te zawnchhuah a, an harsatna chinfel theih dan turte ruahmanna duang chhuak thei tur atana inelna ruahmanna sak nghalin, he inelna a titha zual tan lawmman siam sak an ni dawn bawk a, nimin-a he hun hmanna ah hian Serchhip District chhunga Entrepreneur lama tui te leh Govt. Serchhip College zirlaite bakah sawrkar hnathawk te an tel a ni.

Comments

Chhiar Hlawhte