Forensic Science Laboratory-ah Case 2260 khawih

Assembly Session neih meka pharh tawh, Economic Survey 2019-2020 a a landanin, Mizoram Forensic Science Laboratory chuan kum 2016 atanga 2019 chhungin Case 2260 an khawih a, heng zingah hian Chemistry Department chuan case an khawih tam ber a ni.

Directorate of Forensic Science Laboratory hian kum 10 chhungin case tih khawmuan pakhatmah nei lovin, ND&PS Act leh CrPC 167 in a phut angin eng case pawh Laboratory a thlen atanga ni 30 chhungin report an pek chhuah thin thu leh India ramah Mizoram chauh hi Online Case Tracking System kalpui thei awm chhun an nih thu Mizoram Forensic Laboratory Director, H. Sangchungnunga chuan a sawi. Tun dinhmunah a tul apianga hman theih tur, misual kutzehnu, fingerprint database 5,957 an kawl mek a, heng misual kutzehnu te hi NCRB-CFPB, Delhi-ah danin a phut angin thawn thin a ni bawk. Police, Excise, ACB, Court leh Department hrang hrang atanga lut case te chu Mizoram Forensic Laboratory-ah hian endik thin a ni a, kum 2019 chhung khan Case 916 leh Sample exam 12,399 an nei a, pawikhawihna hmunah vawi 65 kalin, Court-ah vawi 306 an kal bawk.