Chief Minister hovin FAI Cat-II International Para-Gliding Accuracy Championship kharna neih a ni

Serchhip in a thlen, Fédération Aéronautique Internationale (FAI) Category-II International Paragliding Accuracy Championship, 2020, Serchhip a neih chu Inrinni tlai khan zofelin khar a ni a. Chief Minister Zoramthanga chuan he intihsiakna kharna hun hi khuallian nia hmanpuiin lawmman a sem nghal bawk.

Nilaini Kar kalta atanga neih FAI Category II International Para-Gliding Accuracy Championship, 2020 kharna inkhawm ah Chief Minister, Zoramthanga chuan Para-Gliding intihsiakna hlawhtling tak neih a ni chu lawmawm a tih thu sawiin, he intihsiakna a tel zawng zawng chungah lawmthu a sawi a. Serchhip bialtu MLA te, Official te, mipui te leh he intihsiak buaipuitu zawng zawng chungah lawmthu sawiin, he Championship hi intihsiakna chhinchhiahthlak tak a nih zel a beisei thu a sawi a. Mizoram in a vawi khatna atana International Level Championship a thleng chu ropui a tih thu sawiin, nakin zelah pawh khawvel huap paragliding intihsiakna hi Mizoram in a thlen leh zel a beisei thu a sawi a. Chumi atan chuan participant tam zawk an tel a, he intihsiakna hi Mizoram leh India ramah a lo thanlen zel a beisei thu a sawi a. Intihsiakna a tel Pilot te pawh championship neih chhungin hun nuam tak an hman a beisei thu leh, intihsiakna buatsaih leh zel turah pawh lo tel thin turin a sawm a ni.
Chief Minister chuan Mizoram chu ram te tak te, development lamah ram changkang zawkte nen khaikhin chuan la sanglo tak ni mahse a chhung a cheng ten theihtawp an chhuah a tihtak zeta an thawhchuan khawvelah kan langsar thei tih sawiin, Zoram hmun tinah mipuite chu eng chhuah tura sawmin, ramdang mite an lo kalin mipuiin an nunah leh chet danah Mizoram mawina leh thatna an lan chhuah tir theih nan inbuatsaih theuh turin a sawm a. Tuna rahbi pakhat kan rah tawh na atang hian khawvela langsar chho zel theihna turin rahbi danga kaichho zel a hmasawn thei turin hmalak puiah mipui a sawm bawk.
Tourism Department-a Commissioner & Secretary, Esther Lalruatkimi kaihhruai he hunah hian khualzahawm Tourism Minister, Robert Romawia Royte chuan MASA leh Department hmalakna zarah tuna Para-Gliding Championship nghahna hmun chu Para-Gliding na hmun nghet a nih theih tak tur thu a sawi a. Khawvel hriat ah India ram leh Mizoram phochhuah theihna hmun tur a nih thu sawiin, tuna Championship kan thlen pawh hi Serchhip emaw, Mizoram in a thleng chauh nilovin, India ramin a thleng a ni, a ti. World Cup thleng turin leh kumtin a neih (Annual Event) a nih theihna turin hmalak chhoh zel a nih tur thu leh phuisui zawkin infrastructure tha zawk pawh siam tum a nih thu a sawi a. He Championship neih theih nan a sum mamawh angte harsa lo taka NEC atangin leh Mizoram sawrkar atangin a hun taka hmuh a ni chu lawmawm a tih thu sawiin, Serchhip DC hmalakpuina leh mipui te tawiawmna chungah pawh lawmthu a sawi bawk.
Tun tuma intihsiakna ah hian a tirah mi 70 velin tel turin an hming pelut mah se chhan hrang hrang atangin rawn kal theilo an awm ta nual thung a, a tawp thlenga tel chu ram 5 atangin Pilot 23 chiah an ni ta thung a. Heng te hi Korea, Afghanistan, Kazakhstan leh India atang niin Mizo thalai pahnih an tel bawk a. Hmeichhe Category-ah Jin Hee Baek (South Korea) chu pakhatna niin pahnihna Jae Ryun Ha (South Korea) leh pathumna Rupa Devi Karki (India) te an ni a. Mipa Category-ah Byung Chang Jeun (South Korea) chu pakhatna niin pahnihna chu Igor Virshki (Kazakhstan) leh pathumna Vishal Kumar (India) a ni.
Team-a inelna buatsaih ah Korea bawk che tha lehin pakhatna an ni a, Bir Billing chu pahnihna niin ram hrang hrang atanga tel ten an siam, 3K chu pathumna an ni a, Mizoram Para-Gliding Pilots chu palina an ni bawk.

Comments

Chhiar Hlawhte