Remchang hmasa ah hnathawh siamthat tum

Cheng nuai 78.91 senga Serchhip P&E Veng a Retaining Wall leh Hume Pipe phum hna thawh chu hun remchang hmasa berah siamthat tum a ni.

Assembly Budget Session neih mekah Serchhip bialtu MLA, Lalduhoma chuan Chief Ministers’ Development Priority Fund (NEDP) hnuaia cheng nuai 78.91 senga Retaining Wall leh Hume Pipe siam chungchang hi zawtin PWD changtu Chief Minister, Zoramthanga chuan he hna, Vety Tuikhur lui P&E Veng ami hi PWD Serchhip Division in Departmental-a an thawh a nih thu a sawi a. Departmental-a thawh a nih avangin he hna thawhna atana sum chu July 24, 2019-ah pekfel a nih thu a sawi bawk.

Hei bakah hian Chief Minister chuan he hna hi a vaiin thawh zawh a nih thu pawh a sawi a, ‘A hnathawh chhiat zia hi Department hian a hre lo em ni?’ tia zawhna chu, “A hna zawng zawng hi a chhe vek lova. Amaherawh chu Hume Pipe atanga tui luanchhuahna apron hi Fur tuihawk khan a len khawk a, siamtha tura hmalak a nih laiin Central K|P General Conference nghahna tur Leisekawt Field laihzauhna leivung paih in apron hi a chhilh leh avangin hmalak theih a ni ta rihlo a ni,” a ti a. A remchang hmasa berah siamthat tum a nih thu a sawi bawk.