National Science Day 2020 lawmna neih a ni

Mizoram Science, Technology & Innovation Council (MISTIC) chuan nimin khan National Science Day 2020 lawmna ATI Auditorium, Aizawl-ah an buatsaih.

Directorate of Science & Technology hnuaia awm MISTIC in National Science Day an lawmna hun hi Planning & Programme Implementation Secretary, Dr. C Vanlalramsanga chuan hmanpuiin MISTIC in he hun dechhena Science lamah Ph. D degree nei Mizo hmeichhe 86 lai chawimawina an hlan chu lawmawm a tih thu a sawi a, Mizo hmeichhe te khawvel huap pawhin an duai lo hle tih sawiin, an thiamna leh theihna te chu Mizoram hmasawnna atan hmang tangkai turin ngaituahna sengin tih takzeta hma la turin a fuih a. Khawvel huapa Science leh Technology lama hmeichhia te dinhmun tarlangin, heng chanchin atangin Science lamah Mizo hmeichhia ten dinhmun chu tha thawkhatin a chhuanawm hle ni a lan thu a sawi bawk.

National Science Day hi Fenruary ni 28, 1987 atangin rampum ah lawm thin niin Physics-a Nobel Prize latu India mi, Dr. CV. Raman-a’n February ni 28, 1928 a Raman Effect a hmuhchhuah ni hriatrengna ni a ni a. Kumin National Science Day hi ‘Women in Science’ thupui neia hman niin Mizoram-ah chuan ‘National Science Day’ hi kum 2006 atang khan hmang tan a ni a, Astronomy Camp, Mock Parliamentary Show, Science Awareness Campaign, Nature Study, Essay Competition, Science Exhibition, Exposure Tour te huaihawt thin niin kumin hian Mizo hmeichhe, Science lamah Ph.D degree nei hmeichhia 86 te chu a bika chawimawina hlan an ni a. National Science Day pual Essay inziahsiakna neih a lawmman la te hnenah lawmman sem a ni bawk.