'Go to the People-Mipui hnenah kal rawh'

Serchhip District chhunga Neihloh khua ah niminpiah khan 'Go to the People-Mipui hnenah kal rawh' tih thupui hmangin Sawrkar Department hrang hrang 10 te chuan an Department hmalakna leh mipuite hriat atana pawimawh turte in hrilhhriatna an nei.
Thenzawl SDO (Civil) Office buatsaiha 'Go to the People-Mipui hnenah kal rawh' thupui hmanga Govt. Neihloh Middle School-a he hun hman hi Neihloh VCP, Hming-thanmawia chuan kaihruaiin he hun hmanpuitu Thenzawl SDO (Civil), Kulothungan A, IAS chuan he hun an hman chhan leh he ruahmanna in a tum te a sawi a, ani bakah hian District Agriculture Officer, C. Lalnithanga leh Department hrang hrang aiawh ten thu an sawi bawk a, hemi hnu hian Thenzawl leh Serchhip atanga Sawrkar Department sawm (10) kalte chu mipui, a mamawh apiang dawr theih turin an inhawng zui nghal a, mipui ten an duh leh mamawh te zawtin mi 250 zetin an dawr a ni.
Neihloh-a 'Go to the People-Mipui hnenah kal rawh' hun hman ah hian Sawrkar Department sawm (10) - SDO (C) Thenzawl, Agriculture Department Serchhip, BDO Office Serchhip, P&E Department Thenzawl, Mizoram Rural Bank Thenzawl, State Bank of India Thenzawl, Horticulture Department Thenzawl, Community Health Centre Thenzawl, Integrated Ayush Hospital Thenzawl leh Thenzawl Police Station Staff te an kal a.  Nileng-a hun hmangin Thenzawl SDO (Civil) Office atangin Certificate hrang hrang 172 (Tribal Certificate 76, Income Certificate 54 leh Residential Certificate 42) mipui hnenah pekchhuah an ni.
Heng bakah hian BDO Office Serchhip atangin Aadhaar Card siamthar leh a diklo siamthat ngai 118 buaipui niin Thenzawl Community Health Centre leh Integrated Ayush Hospital ten a thlawna inentirna an buatsaih ah mi 200 (CHC-ah mi 114 leh Ayush-ah mi 86) an inentir a. Ayush Hospital hian thisen test chi hrang hrang - rannung seh, Typhoid, Diabetis leh a dangte a thlawn veka tih sakin, an hnena damlo inentir te hnenah Damdawi a thlawnin an sem bawk a. Mizoram Rural Bank, Thenzawl Branch ten Account hawnsak leh thildang tihsak mi 36 an nei a, State Bank of India, Thenzawl Branch in mi 14 an tihsak bawk a ni.

Comments

Chhiar Hlawhte