Aizawl-ah State Day lawm

Mizoram State Day vawi 33-na chu nimin khan Aizawl-ah pawh lawm niin Mizoram Governor, P.S. Sreedharan Pillai chuan khuallian niin a hmanpui a ni.
Aizawl Vanapa Hall-a Mizo-ram State Day lawmna ah hian Governor P.S. Sree-dharan Pillai chuan State puitlinga inhlangkai tura Zalenna insualtute inpekna thuk tak te, Mizo mipuite thlawpna, thawhrimna leh tawrhna zawng zawng chhutletin “Mizoram State Day” hi a hlu em em a, ropui taka lawm a phu hliah hliah a ni, tiin he Ni chhinchiah tlak takah hian Mizoram mipuite hnenah duhsakna leh lawmpuina a hlan a. Kan state hlawhtlinna atanga lo lang chiang em em mai chu tunlai khawvel buai takah pawh hian a ram mipui ten an duh a; hruaituten tharum thawhna aia remna leh muanna an dahsan phawt leh thlah lova an vawt tlat chuan remna tluantling a awm thei a ni, tih a nih thu sawiin, “Remna leh muanna neitu kan nihna hi kan chawisang anga; hmasawnna kawngah pawh chak zawka ke pen zelin state zahawm kan nih tawh bakah state intodelh nih tel kan tum tur a ni,” a ti.
He hunah hian Mizoram Chief Minister Zoramthanga pawhin thu sawiin Mizoram tana ni pawimawh bik, State piancham lawm tura kal-khawm zawng zawngte chibai a buk a. He ni chhinchhiahthlak tak hi harsatna tam tak paltlang hnu a chang thei kan ni tih sawiin, Mizoram in State nihna a chan theihna tura remna sualchhuah a nih dan te, mipui, Kohhran leh NGO te hmalakna leh sawrkar laipuia hmalakna te a sawi a. Mizoram chu hmasawnna kawngah leh remna kawngah state dang leh ram dangte tana entawntlak tura hmalak chu a chhung a chengten hma kan lakna tur a ni, a ti bawk.
Aizawl-a State Day lawman inkhawm hi Chief Secretary, Lalnunmawia Chuaungo chuan a kaihruai a NGO Coordination Committee Chairman, Vanlalruata pawhin thu a sawi bawk.

Comments

Chhiar Hlawhte