Mizoram chu Organic State-a puan ngam a ni rih lo tih Agriculture Minister in a sawi

Agriculture Minister, C. Lalrinsanga chuan 'The Mizoram Organic Farming Bill, 2004' pass a nih hnu hian Mizoram chu Organic State-a puan ngam a ni rih lo tih a sawi.
Mizoram Legislative Assembly Budget Session neih mekah nimin-a zawhna leh chhanna huna Lunglei North bialtu MLA, Dr. Vanlaltanpuia zawhna chhanga he thu hi sawiin Agriculture Minister chuan The Mizoram Organic Farming Bill, 2004 pass a nih hnuah Mizoram chu Organic State-a puan ngam a ni rihlo tih sawiin, Mizoram chhung bikah chuan Farmers ten Fertilizers leh Pesticides an hman thin chu a him leh him loh zirchianna a awm lo tih a sawi a. Zawhna neitu Dr. Vanlaltanpuia chuan India ramah Cancer vei nasa ber state kan ni tih sawiin, “Rannung kahna hlo te kan leklam hle a, heng te nen hian a inkaihhnawih thei em? A him tawk chiah em?” tih a zawh bakah “Mizoram-ah thlai thar a hlawk lehzual nan Soil Test a ni em?” tih te a zawt a, Agriculture Minister chuan Chemical thil, rannung kahna hlo ang chi te pawh hian hriselna lamah chuan nghawng thalo chu a nei niin mithiam te chuan an sawi thu a sawi a. “Kan thlai ei thin te a him leh him loh zirchianna hi chu hmalak kan tum,” a ti a. Soil testing chungchangah, “Hmanrua chu kan nei tha a, hma kan la zel e,” a ti bawk.
Serchhip bialtu MLA, Lalduhoma pawhin zawh belhna siamin Sawrkar laipuiin Fertilizer chu Factory rate-in District hrang hrangah permit nei te hnenah a semchhuah thu sawiin, Mizoram-ah pawh permit nei engemawzat awmin, MNF sawrkar hmasa atanga tun thleng hian Mizoram khawi khuaah mah lei tur awm lo khawpin Burma lamah thawn ruk zawh vek a nih avangin Mizoram mipui hian kan puala fertilizer lo kal hi kan hmu pha lova, hei hi tih reh tum a ni em? tiin a zawt a. Hei hi chhangin Agriculture Minister chuan Fertilizer tel lo, Organic Farming lamah tanlak an tum nasa tih a sawi a, Fertilizer kan chan tur ang kan chang lo tih laia harsatna awm a zangkhai zawnga ngaih rih mai tha a a hriat thu a sawi a. House Leader, Zoramthanga chuan Organic Farming lamah tan lak nasat a nih tur thu a sawi rualin, Fertilizer chu Rua leh Mau lamah mamawh a nih tur thu a sawi a, Mizoram chan tur Burma lama tlang chho nia sawi pawh theihtawpa dan an lo tum tur thu a sawi bawk.

Comments

Chhiar Hlawhte