Poshan Abhiyaan hnuaia Mizoram in National Award a dawn Serchhip-ah lawm a ni

India rama naupang, nu naupai leh nau hnute pelai ten chawtha an mamawh ang an hmuh theihna tura hmalakna, Poshan Abhiyaan hnuaia Mizoram in National Award a lak lawmna ICDS Project tinah neih tura tih a nih angin Serchhip ICDS Project chuan he Award lawmna hi neiin District Bawrhsap, Dr. Lalzirmawia Chhangte chuan a telpui a ni.

Mizoram in Poshan Abhiyaan hnuaia National Awardba dawn lawmna Serchhip P&E Veng YMA Hall-a neih ah hian District Bawrhsap, Dr. Lalzirmawia Chhangte chuan Poshan Abhiyaan hnuaiah Mizoram chuan lawmman ropui tak a dawng tih sawiin, helama thawktu zawng zawngte inthlahdah bik awm lova tanrualna rahchhuah atanga kan dawn anih thu leh a Field-a thawk te a lawmpui thu a sawi a. ICDS hmalakna leh hnathawh hrang hrangte sawiin, India ram chu Welfare State a nih thu leh sawrkar pawhin a mipui te hamthatna atan kawng hrang hrangah hma lain ruahmanna a siam thu leh hetiang ang ram hi an awm loh thu a sawi a. Nu te hriselna atan pawh ruahmanna hrang hrangte siamin, hnamdang ten nu te an pawimawh zia hriaa an nunchhuahpui angin kan la nunchhuahpui tawklo nia a hriat thu a sawi bawk.

National Poshan Abhiyaan National Award lawmna hun hi Serchhip ICDS Project-a CDPO, Lalbiakliana chuan kaihhruaiin James Lalremliana, District Coordinator, Poshan Abhiyaan chuan an hmalakna leh kalphung sawiin, F. Hmingthanmawii, District Coordinator, PMMVY pawhin an hmalakna te a sawi bawk a ni.

Poshan Abhiyaan (National Nutrition Mission) hi India in programme lian tak a siam zing ami niin kum 2018 atanga hman tan niin Mizoram-ah chuan kum 2019 atangin kalpui tan a ni a, he Programme hian naupan thanthu ( Stunting) leh ei chhiat vang a buk zang (Wasting) tih tlem te, naupang, nu leh hmeichhe tleirawl a thisen tlakchhamna (Anaemia) tih tlem te leh naupiang hlim buk zang (Low Birth Weight) te tih bo te chu a thil tum zinga langsar niin kum 2022-ah heng natna te hi 38.4% atanga 25%-a tih tlem tum a ni a. Poshan Abiyaan hnuaiah hian hmalakna leh hnathawh dan tha taka vil niin hemi atana siam Software hmangin Anganwadi Workers te hian nitin an Phone dawn atangin an hnathawh dan an report thin a. Hei bakah hian mipuite hnenah hriselna leh nutrition chungchang in hrilhhriatna (Community Based Events) chu thla khat ah vawihnih neih thin niin Health Department te nen tang tlangin thlatin vawikhat Vaccine lak leh Awareness (Village Health Sanitation & Nutrition Day) neih thin a ni bawk. 

POSHAN Abhiyaan hnuaiah hian kumtin Award sem thin niin, hetah hian kawng hrang hranga hnathawk tha State te chu lawmman atan Citation leh pawisa fai pek thin an ni. He Award-ah hian State hrang hrangte hi hmun kilkhawr dan leh population a zirin Group 4-ah then niin Mizoram hi Group 4 zingah a awm a, hetah hian Mizoram chuan National Award pahnih dawngin, an hmalakna atanga tehin Overall Excellence in Implementation dawngin he Award a dawng a, hei hian pawisa cheng maktaduai 1.5 a keng tel a, he hmalakna in a tum ber chu mipui vantlang rilru sukthlek thlak tir (Behavourial change) leh chumi atan a thawktute chher hriam niin thupui hrang hrang neiin thla khata Inrinni hmasa ber leh a vawithumna ah hman thin a ni.

Hei bakah hian Anganwadi Workers ten nitin-a an hnathawh te an report thinna, Common Application Software (CAS) hnuaiah ICDS-CAS tih vuahin nitin-a Anganwadi Workers te hnathawh dan an thehluh chu Dashboard atangin Block leh District-ah te, State leh Central lam atangin enfiah thin a ni a. He an hnathawh danah hian ICDS-CAS Implementation Award hi Mizoram chuan dawng bawkin he Award hian pawisafai cheng maktaduai khat a keng tel bawk a ni.