MSSSB Chairman atan Political Party mi dah duhlo

Mizo Students’ Union (MSU) chuan Mizoram Subordinate Services Selection Board (MSSSB) Chairman atana Political Party mi leh sa dah a ni chu Zoram thalai leh zirlaite dinhmun ngaihtuah in tha an ti lo tih an sawi.

MSU General Hqrs. hian nimin khan Aizawl-a MSU Pisa Pui-ah Executive Meeting neiin he thu hi an sawi a, MSSSB din a nih dawna MSU leh sawrkar indawrna neih a nih tum khan zirlaite hmakhua ngaihtuahin MSU chuan Party induhsakna awm thei zawng zawng lak ata MSSSB chu thlitfim a nih theihnan rawtna a lo siam tawh tih sawiin, tuna Chairman atana party mi leh sa dah a ni chu thalaite rilru a hlauhthawnna awmsa chawh thawhna leh Mizo zirlaite aiawha thu thlen zahlohna lian takah an ngai tih an sawi a. MSSSB Chairman atan hian political party a inhnamhnawihna nei lo, mithiam dah lehthuai a nih theih nan theihtawp a chhuah zel dawn tih an sawi bawk. Tarlan tawh angin Mizoram sawrkar chuan MSSSB Chairman atan hian Lalrammawia MSS (Rtd) chu a ruat a ni.