HIV kai tam lamah Mizoram pakhatna

Mizoram-ah AIDS hrik HIV kai mi 21,538 an awm mek a, HIV Positive hmuhchhuah tawh zingah hian kum 25 leh 34 inkar an tam berin, tun dunhmunah India ramah Mizoram chu he natna kai tam lamah pakhatna a ni mek tih Health Minister, Dr. R Lalthangliana chuan a sawi.
Nimin Assembly Session zawhna leh chhanna hunah MLA pahnih, Lalduhoma leh Dr. Vanlaltanpuia te zawhna intawm chhangin Health Minister chuan, tun dinhmuna Mizoram-a HIV kai mek zat hi kum 1990 October atanga December 2019 inkar chhung ami a nih thu a sawi a. HIV/AIDS tam lama India rama pakhatna a nih mek dan hi, National AIDS Control Organisation (NACO) chhut dan atangin a ni, a ti. Mipui za zela HIV kai zat chhut-chhuah nan hian National Working Group on HIV Estimation a awm a. He Group hian State hrang hrang tan Standard Method hmangin, UNAIDS-in a siam Software Spectrum chu khawvel pumpuia HIV kai zat chhut chhuah nana hman thin a ni a, hei hi Mizoram-ah pawh hman thin a ni, a ti.
Mizoram State AIDS Control Scoeity (MSACS)-in NACO atanga tanpuina hrang hrang a dawn thin bakah, Mizoram sawrkarin HIV/AIDS dona a kalpui mekah State sawrkar sum te dah ve theih a ni em tih zawhna chhangin Dr. R Lalthangliana chuan, State Budget head-ah awm mah se, token-in cheng singhnih khat vel te chu a lo awm mai thei a, mahse, he natna kai tam lama Mizoram pakhatna a ni chu a rapthlak in a thalo hle a. Chuvangin, budget-ah te pawh la inpe turah an ngaih thu leh Finance lamah thlen a nih thu a sawi bawk.
Mizoram dinhmun heti hi a nih avangin department mal tan chauha do ngawt theih pawh a ni tawh lo tih sawiin Health Minister chuan, Synod hotute, Mizoram Kohhran Hruaitute Committee te, Central YMA te, Doctor Association 2 – MGDA leh IMA te bakah Kohhran hrang hrangte dopui tura sawmin Committee huam zau zawk din mek a nih thu a sawi a. MZP te pawhin he natna do tura sawrkar tanpui an inhuam thu an hrilh tih a sawi. Sawrkar hmasa lama Legislator Forum lo din tawhte pawh la tawp chuang lova ngaiin, hun remchangah MLA te pual bika HIV/AIDS chungchanga hriat tur tul leh pawimawhte inhrilh-hriatna hunte pawh buatsaih tum a nih thu a sawi bawk.
Mizoram State Health Care Scheme (MSHCS) hnuaia sawrkarin rate siam chungchanga lungawilo Private Hospital-te sawrkarin engtinnge inremna a siampui tih Congress Member Zodintluanga zawhna chhangin Health Minister chuan, State sawrkarin notifed rate a neih a tul a, chumi ang chuan kal phawt tura ngen an ni a, a tak taka kalpuinaah Private Hospital ten harsatna an tawh an thlente chu ngaihtuahsak chhoh zel tur a nih thu in a chhang a ni.

Comments

Chhiar Hlawhte