Bharat Scouts & Guides State Rally zawhfel a ni

Tunkar Thawhtanni atanga neih Mizoram Bharat Scouts & Guides 14th State Rally, 2020 chu nimin khan zawhfel niin he Rally kharna hun hi Chief Minister, Zoramthanga chuan a hmanpui a ni.

State Training Centre, Tanhril-a he Rally kharna hun nimin zing-a neih ah Mizoram Bharat Scouts and Guides President leh Chief Minister, Zoramthanga chuan kum sawm hnuah Mizoram Bharat Scouts & Guides ten State Rally an nei leh thei chu a lawmpui thu sawiin, Scouts leh Guides te chu an rally atang inunauna leh inhriatthiamtawnna te an zirchhuah a, an upat hun thleng pawha a tha zawnga an nun tidanglamtu a lo nih ngei a duhsak thu a sawi a. An hma hun zelah harsatna te pawh tawk mahse tumruhna nen engkim an hneh thei a ni tih sawiin, kan dinhmun thlak theilo mah ila keimahni kan inthlak thei a ni tih a hrilh a. Chief Minister chuan he Rally a Scouts & Guides kalkhawm te chu zialzuk, zu leh ruihhlo laka fihlim tura chahin, zirlai 409 te pawh chuan fihlim turin an iniam bawk.

|halaite tiphur tura hmalak chu sawrkarin a ngaihpawimawh zing a mi a nih thu Chief Minister chuan sawiin, Scouts and Guides tana activity buatsaih bakah NSS-ah te, NCC leh infiamna lamah te pawh activity hrang hrang ruahman chho zelin, a remchan dan ang zelin State chhung mai nilo, India hmarchhak state leh ram pum huap thlenga Mizoram in a thlen theih dan ngaihtuah a nih tur thu a sawi bawk.

He Rally kharna hun hi Sports Minister, Robert Romawia Royte pawhin khual zahawm nia hmanpuiin Scouts & Guides te tan State pum huapa Rally neih chu thil hlawkthlak tak ni a a hriat thu a sawi a, tun hun mai bakah nakin thlenga nun tana tangkai tur thiam thil zirchhuahna tangkai tak a nih thu leh, chin thalo laka invenna leh fihlim tura invenna tha tak a nih thu a sawi a. Kum engemaw zah hnuah Rally buatsaih a ni leh thei chu a lawm thu sawiin, hman chhunzawm leh zel beisei a nih thu a sawi a. |halaite hmasawnna lamah sawrkarin nasa taka hmalak a tum thu sawiin, Scouts & Guides activity tam zawk neih bakah pawl dangah te pawh zau zawka hmalak zel tum a nih thu leh Sports & Youth Services Department hmalakna in NSS enrollment tam zawk nei tura hmalak tum a nih dan te a sawi a. NCC Battalion thar Lunglei a siam pawh Office luah theih tep a nih thu sawiin, Education Department nen a inbia in, Scouts & Guides enrollment tam zawk neih theih nan ruahmanna siam tum a nih thu a sawi bawk.

Mizoram Bharat Scouts & Guides 14th State Rally 2020 ah hian District zawng zawng tel kimin, an vai hian Rally Ranger, Service Guide leh Officials riaklut te nen mi 409 vel an ni a. Inelna hrang hrang 10 zet neih a ni bawk.