Mizoram Assembly Budget Session tan Ni-ah Larsap in House-ah thu a sawi

Mizoram Legislative Assembly Budget Session chu nimin khan neih tan niin Session tan Ni hian Mizoram Governor, PS. Sreedharan Pillai chuan House-ah thu sawiin, a thusawi chungchanga lawmthu sawina Motion putluh a nih hnuah nimin atan thutkhawm tihtawp nghal a ni.

Mizoram Legislative Assembly 8-na thutkhawm vawi 5-na nimin a neih tan Ni-a thu a sawina ah Mizoram Governor chuan House member-te Mizoram hmasawnna atan Session-ah tha taka an tel a beisei thu a sawi a. A sawrkar chuan sawrkar inrelbawlna ah rintlak, langtlang leh taima taka a kal thu sawiin, “Sawrkar tum ber chu Economic lama intodelh a ni a, chumi atan chuan Agriculture leh Infrsttructure lama hmasawnna kalpui tum a ni. Industry lama hlawkpui tham kalpui tum a ni a, a bik takin Mau leh thildang kan neihte hman tangkai tum a ni a. |halaite Skill Development, Entrepreneurship leh Sports hmanga tih hmasawn pawh kan ngaih pawimawh zinga a mi a la ni zel,” a ti a. Mizoram chu rampum-a State ralmuang tak a nih thu sawiin, kawng hrang hranga mahni intodelh tur leh ei leh bar kawnga dinhmun tha zawka hlang thei turin sawrkar chuan hma a lak zel dawn thu a sawi bawk.

Tripura Refugee Camp-a Bru-te chungchangah sawrkar laipui, Mizoram leh Tripura sawrkar in inremna an ziak ta chu lawmawm a tih thu sawiin Larsap chuan, “Kum 22 chhung buaina awm tawh chinfel a ni ta hi a lawmawm takzet,” a ti a, Bru chungchanga buaina awm chinfel a awm theihna atana NGO, Kohhran, mipui leh sawrkar hmalaknaah a lawm thu a sawi bawk.

Mizoram Governor chuan sawrkar chuan kum khat Office an luah tak thu sawiin, “Hemi chhung hian Mizoram hmasawnna atan kawng hrang hranga hma lak a ni” tiin Kum liamta ah khan Economic lamah hmasawnna chhinchhiah tlak tak kan tawh thu a sawi a, “Nikum chhunga kan Economic Growth Rate chu 14.82% a ni a, hei hi India rama a sang berte zinga mi a ni,” a ti bawk.

Larsap PS. Sreedharan Pillai chuan sawr-kar Flagship programme, SEDP tih hlawhtlinna atan Board 14 din a nih thu sawiin, “Board-ah hian Minister, MLA, mithiam leh Official-te an tel. Heng Board-ah te hian Department 25 sem sawm a ni a, SEDP project a hlawhtlinna atan thurawn te pein, an vil dawn a ni,” a ti a, mipui tam zawkin an buaipui Agriculture and Allied Sector chu an ngaih pawimawh a nih zel tur thu a sawi bawk.

Loneitute harsatna sukiang turin sawrkar chuan State leh District Level-ah Co-ordination Committees for Doubling Farmers Income by 2020 a din thu pawh sawiin Governor chuan, “Kan State hian Horticulture lamah hmun hma tha tak, employment atan leh sum lakluhna atan kan nei a ni,” a ti a. Thawnchhuah tur hisap in Dragon fruit leh Madarin Orange-te tam zawka chin a ni tih sawiin, “A hlawhtlinna kan hmu mek. Thlai chin pawh Cluster Mode-a kalpui a ni,” a ti bawk.

Sawkar in Autonomous District Council area tel lo chuan state hmasawn tluantling anih thei lo tih a hriat thu sawiin Larsap chuan, heng area-ah te hian hmasawnna lam hawi tam taka hmalak a nih thu a sawi a, Zirna lama hmasawnna ah te, tui thianghlim in tur lamah te, electric lamah te hmalak a ni tih sawiin, kawng thar siam leh Solid Waste Management System tih chang-tlunte chu hmachawp a nih thu a sawi bawk.

Nimin a House-a Larsap in thu a sawi zawh hnu hian Governor thusawi chungchanga lawmthu sawina Motion, Motion of Thanks chu MNF Member, H. Biakzauva chuan a pulut a, he Motion hi Vawiin-ah sawihona neiin pawm tum a ni dawn a ni.