Dan leh thupek te tharum hmanga lekkawh tur a ni lo tih Home Minister in a sawi

Home Minister, Lalchamliana chuan West Lungdar-a hnamdang kutthlak leh motor halna a thleng chu vanduaithlak a tih thu a sawi a, Dan leh thupek te chu mimal emaw, mipui pungkhawmin emaw, tharum thawhna hmanga an lekkawh tur a ni lo tih a sawi.

Home Minister hian nimin-a Assembly rorel inkhawmah West Lungdar-a thil thleng hi a sawi chhuak a, Misael Lalremruatpuia (13) s/o Vanlalmawia Chhangte, West Lungdar Mamit District chu kidnap tum anih thu Thawhtanni khan Social Media-ah a thang nasa hle tih a sawi a, naupangin amah rukbo tumtute nia a sawi, Bolero var-a chuangte chu West Lungdar leh a chhehvel ten an zawng a, he thil hi hriat a nih veleh a chhuichiang turin Thawhlehni khan Kulikawn Police Station OC hovin Staff pathum an kal a. West Phaileng atangin SDPO leh OC te bakah Dy. SP CID (SB) ten West Lungdar hi an pan tih a sawi a. Thawhlehni zing dar 9:00-ah South Sabual khaw mipuiten vai rinhlelh an man thu hriat a nih veleh Kulikawn Police Station OC leh a hoten South Sabual hi panin thu zawhfiah tura Kulikawn panpui tumin hma an la nghal tih sawiin, rinhlelh man te hi Uttar Pradesh Meerut mi pahnih Rahul Choudhuri (27) leh Raju Mansuri (38) bakah Silchar mi, Situ Hussein Majumdar (21) te an ni tih a sawi.

Home Minister sawi danin heng hnam-dang pathumte hi Kulikawn Police Station-a hruai tura hmalak nimahse mipui pungkhawmten West Lungdar-a hruai phawt an tum avang leh mipuiin Police te an tam hneh avangin Police chah te an thlen hmain West Lungdar panpui luih an ni ta a, naupang hian amah rukbo tumtute nia a sawi avangin rinhlelh pathumte hi mipuiten kut an thlak a, Police ten chhan an tum pawhin an dang zo lo a, kut an tawrh nual hnuah harsa takin Aizawl panpui an ni a. An chuanna Bolero dum, Registration no AS-11-D/7533 leh bungrua an phurh TV 8 te chu vaw chhiain an hal vek a ni.

Heng hnamdang hliam tuarte hi Civil Hospital Aizawl-ah an hriselna dinhmun endik a ni a, damdawi In-a awm ngai an nih loh avangin Aizawl Police Station-ah dah an ni tih Home Minister chuan sawiin, inrukbo tumna kaihhnawih ah hian Kulikawn Police Station-ah thubuai ziahluh a nih thu leh Motor hal leh kut inthlak chung-changah West Phaileng Police Station-ah thubuai ziahluh a nih thu a sawi  bawk.

Home Minster chuan naupang rukbo tum hun nia sawi hi Thawhtanni (Feb. 24, 2020) tlai dar 3:00 vel a ni tih sawiin, hnamdang pathum te hian hemi ni vek hian Vairengte Check Gate chu  chawhma dar 11:27-ah thlengin ILP an lachhuak a, Aizawl lam panin tlai dar 4:45-ah Leela Hotel |huampui-ah an lut a, a tuk Feb. ni 25, 2020 zing dar 7:00 velah Hotel an chhuahsan a, World Bank Road-ah kalin Darlung leh Sabual lamah an lut thla a, Darlung leh Sabual-ah mi In ah lut kualin an TV ken an zuar kual a, Sabual-a an awm laiin man an ni ta tih a sawi.

Misual nia hriatte zawng tura YMA leh khawtlang mipuiten tha an thawh chu lawmawm a tih thu Home Minister chuan sawiin, hetihrual hian West Lungdar-a thil thleng chu vanduaithlak a tih thu a sawi a, “Dan leh thupek te hi mimal emaw, mipui pungkhawmin emaw, tharum thawhna hmanga an lekkawh tur a ni lo tih hriat nawn a tul a ni,” tiin India ram hmun hrang hrangah kan tu leh fa te an awm ve a ni tih thinrim nikhua ah pawh hriat fo a tul a ni, a ti bawk.