MNF sawrkar in SEDP an sem theilo - MPCC

Mizoram Pradesh Congress Committee (MPCC) chuan MNF sawrkarin Budget-a cheng Nuai 75,000 dah chungin SEDP cheng khat pawh an sem thei lo niin an sawi.
Nimin-a thuchhuah an siamah MPCC chuan MNF sawrkar chuan kum 2019-2020 budget-ah SEDP kalpui nan cheng nuai 75,000 an dah tih tarlangin, tunah hian Financial year a tawp dawn ruai tawh a, Financial Year thar atana Budget Session neih a ni leh tawh chung pawhin Mizoram-ah SEDP tanpuina sum dawng pakhatmah an la awm lo niin an tarlang. MNF party hian kum 2018 MLA inthlan dawn khan chhungkaw tin hnenah cheng nuai 3 sem an intiam a, MNF President, Chief Minister ni mek Zoramthanga ngei chu chhungkaw tina nuai 3 sem tiamtu a nih thu leh a tiam lai ngei video pawh hmuh tur a la awm reng tih an tarlang.
Hei bakah hian MPCC thuchhuah chuan MNF sawrkarin SEDP atana cheng nuai 75,000 a dah hi Mizoram budget ngaihtuah chuan a tam hle tih pawh tarlangin, Mizoram budget 2019-2020 atangin 7% zet a ni tih an tarlang a. Sawrkar department hrang hrangte zingah SEDP atana an sum dah aia Budget nei tam chu Department pathum – Finance Department, Home Department leh School Education chiah an awm tih pawh an tarlang bawk a.  Mizoram Budget-a cheng nuai 75,000 dah a ni chunga MNF-in an intiam anga cheng nuai 3 an sem thei lo chu Mizoram Pradesh Congress Committee (MPCC) chuan mak an ti hle tih tarlangin, Chhungkaw pakhatah SEDP cheng nuai 3 zelin sem nise budget-a an sum dah hian chhungkaw 25,000 a daih avangin chhungkaw pakhat te mah in an la dawng lo chu a mak takzet tih an tarlang a. Chuvangin, Financial Year a tawp tawh dawn mai bawk si avangin SEDP atana an sum dah zozaite kha eng atan nge an hmanral tih hi mipui hmaah sawifiah ngei tura an phut thu an tarlang bawk.

Comments

Chhiar Hlawhte