Adviser to Chief Minister in Centre of Excellence-a sawrkar hmalakna a tlawh

Serchhip-a rawn kal Adviser to Chief Minister, C. Lalramzauva chuan nimin zing khan Serchhip Lengte-a Centre of Excellence chu tlawhin Horticulture Department hnuaia hmalakna hrang hrang te a tlawh.

Serchhip-a Center of Excellence tlawhtu Adviser to Chief Minister, C. Lalramzauva hi Serchhip DHO, M. Vanlalzami leh ADHO, Lucy Zaithangpuii bakah Horticulture Department-a thawk ten lo dawngsawngin an hmunhma te an fankualpui bakah an hmalakna hrang hrangte an hrilhfiah a. Center of Excellence hi Kuthnathawktute tan thlai chi tha leh man tlawm zawk pekchhuahna tur a buatsaihna hmun niin Serchhip Lengte ram-a he Centre hi |in 8 hmun vela zau a ni a, a bul vela ram neitute nena inremna siamin a hmun pawh an zauh belh zel a ni a, tun dinhmunah Thlai chi siam punna turin Green House 18 awmin, Dragon Fruit pawh chin lai kung 800 chuang a awm mek a, heng bakah hian Kawlthei mu nei lo chi (Seedles Guava - Salii Thong), Serthlum (M. Orange) leh Chinese Tomato te chin a nih bakah Korean ho ngainat em em Chinese Cabbage (Zikhlum) te chin a ni a. Hei hi kuthnathawktu ten hlawhtling takin a ching thei tih enchhin tawh niin, a hlawhtling hle a, a hralhna lamah pawh Kg. 1 zelah Rs. 40/- aiin a hniam ngai lo nia sawi a ni.

Serchhip-a Center of Excellence hnuaiah hian Cluster 8 a awm mek a, Kuthnathawktute tana thlai chi tha chin leh phun tur tha, hrisel (quality planting material) siam leh pekchhuah chu an tum ber niin, Lo leh huan neituten an thlai chin turte chu chin chi a nih leh nih loh te, eizawnna atana hman tlak a nih leh nih loh tur te thlengin an zirchiangin a takin an chingin an enchhin vek thin bawk. Dragon Fruit mimal hnena kung khat Rs. 100 vela an lei thin kha helai hmun atang hian kuthnathawktute tan Kung khat Rs. 30 zelin an lak tir thin bawk a ni.

Nimin zing-a helai hmun tlawhtu Adviser to Chief Minister hnenah hian Horticulture Department a thawktute chuan he Centre panna kawng chu changtlung zawka siam a tul thu lo thlenin hei bakah hian an mamawh hrang hrangte pawh an lo thlen bawk a, Adviser to Chief Minister chuan kuthnathawktute dinhmun chawisang anih zel na turin sawrkarin kuthnathawktute chu a ngaihsak a, a enkawl zui a ni tih an lantir dawn thu sawiin, a panna kawng (Approach road) thuamthat te, Power supply pek dan te pawh a rang lama buaipui a nih tur thu a sawi bawk.

Serchhip-a Horticulture Department enkawl ‘Center of Excellence’ hi kum 2014 khan hawn niin, nikum khan Mizoram-a Centre of Excellent hrang hrang zing atangin anni chiah hi Central Institute of Horticulture (CIH) in Nursery Accreditation 2019-ah Two Star (2 Star) dinhmun a pe a ni.