Mumbai-a Nurse awmlo House-ah sawiho a ni

Mumbai Mizoram House-a damlo te enkawltu, Nurse sawnchhuah a nih vanga Cancer vanga damlo te harsatna tawh nimin Assembly rorel inkhawmah sawilan a ni a, nimin vek khan Male Nurse dahna tur Appointment tih chhuah nghal a ni.
Nimin a Assembly rorel inkhawm zawhna leh chhanna hunah Congress Member, C. Ngunlianchunga chuan Mumbai-a Nurse thawk thin sawnchhuah a nih avanga Cancer natna avanga Mumbai pantu damlo ten harsatna nasa tak an tawh thu sawiin, Nurse hi dah leh thuai theih a ni dawn em tih a zawt a. GAD changtu Chief Minister, Zoramthanga chuan Mumbai-a thawk tur hian a thawk duh mai bakah tawng thiam te dap tel a ngai a, sawrkarin hma a la mek a ni tih a sawi.
Health Minister, Dr. R. Lalthangliana pawhin Mumbai Mizoram House-a Nurse transfer tak chu Health Department in a rawih a nih loh thu leh GAD lamin contract anga an rawih anih zawk thu a sawi a, Speaker, Lalrinliana Sailo chuan Health Department in a rang lamin Nurse dah tur lo dap se tih rawtna a siam a ni. Hetianga zawhna leh chhanna huna sawi chhuah a nih atanga darkar 5 ralhmain Mumbai-a thawk tur hian Male nurse, Edenthar Lalhuanmawia chu appointment pek a ni ta tih Speaker chuan rorel inkhawmah vek hian a puang nghal a. Speaker hian Chief Minister leh Health Minister te an inrawn nghal nia a lan thu sawiin, House-a thil sawichhuah rang taka bawhzui a ni chu lawmawm a tih thu a sawi bawk.

Comments

Chhiar Hlawhte