Serchhip Bazar-ah chawhmeh tihto thar a awmlo

Tunhnaia Phai lam atanga chawhmeh lakluh Serchhip-ah tihto a awm anga thuthang awm chu thu diklo a nih thu Serchhip Bazar-a chawhmeh zuartute chuan an sawi.
Tunkar-a Serchhip in KTP General Conference a dawn tur avangin Phai lam atanga Serchhip Bazar-a chawhmeh zawrh tur laluttu mi thenkhat te chuan an chaw-hmeh zawrh hi an ti to nia sawi a awm a, hemi chungchangah hian nimin khan kan Palai chuan Serchhip Bazar-a chawhmeh zuartu thenkhat te chu kawm kualin an chawhmeh man te a zawtkual a. Phai lam atanga chawhmeh mahni-a lalut-a zuar thin te chuan tuna an rate hman mek chu kar hmasa nen danglamna ala awm lo tih sawiin, direct-a chawhmeh lalutute chuan tunkar chhung chuan chawhmeh rawn thleng tur pawh a awm tawh dawn rihlo nia a lan thu an sawi a. Tunah hian Purunsen chu Kg-ah Rs. 60/- a an pek mek thu sawiin, Alu pawh kg. ah Rs. 30/- niin Parbawr pawh Rs. 50/- ala nih thu an sawi a, Serchhip in khawmpui a thlen tur avanga rate tih danglam tumna an neih loh thu an sawi bawk.
Hetihlai hian Serchhip Bazar building chhunga Phai lam tharchhuah chawhmeh zuartute pawhin tuna an rate hman mek chu kar hmasa lam nen danglamna ala awm loh thu an sawi a, an chawhmeh lakluh te hi chawlhkar tin Thawh-tanni leh Ningani-ah a rawn thlen thu sawiin, Ningani a rawn thleng tur hi nimin, Nilaini khan rawn thleng tawhin tunkar ah chuan rawn thleng tur a awm tawh rihlo tih an sawi bawk.
Serchhip Bazar-ah hian Mizoram chhung leh Serchhip khawpui chhehvel-a tharchhuah chawhmeh pawh thahnem tak awm mekin tun dinhmun ah Zo Tomato chu Kg. ah Rs. 100/- a zawrhchhuah mek a ni thung a, Ser-chhip Zawlpui phai-a Zikhlum tharchhuah chu Kg. ah Rs. 40/- a ni thung a, Zikhlum hi Kg. 10 aia tam la te chu Kg. ah Rs. 30/- hisap-a an pek theih thu an sawi bawk.

Comments

Chhiar Hlawhte