Budget a tlangpui-a sawihona zawhfel a ni

Hreh tak chungin hna thar lakbelh a tul - Chief Minister

Chief Minister, Zoramthanga chuan sawrkar kalta te inrenchem thilah hna thar la lovin an kal ngar ngar tih sawiin, “An kal leh lutuk a, hnathawk thei lovin sawrkar a awm a ni,” a ti a, hei vang hian hreh tak chungin hna thar lak belh a tul a ni, a ti bawk.
Mizoram Legislative Assembly Budget Session neih mekah nimin khan kum 2020-21 Mizoram Budget a tlangpuia sawihona, General Discussion tlangkawma thu a sawina ah he thu hi sawiin Finance changtu Chief Minister, Zoramthanga chuan Police 3000 rual vel hna a ruak a, Works Department-ah thawktute an kaisang chho zel a, a hnuai lamah JE leh SA te an awm ngang lo a, hna thar lak loh chuan hna thawh ngaihna a awm lo a ni, a ti a. Inrenchem lutuka hnathawktu tur Pa ber inhrek riltam chu thil awmze awm lo a ni a, 'Hnathawh kan tum a, hnathawk thei turin kan inbuatsaih a ngai a ni' a ti bawk.
Chief Minister chuan kum 2020-21 Budget a pharh hnuah sawrkarin project a siam atanga Mizoram sawrkarin sum a hnuhluh tur chu cheng vbc. 5 a tling tawh tih pawh sawiin Finance changtu Chief Minister chuan, kum 2020-21 Budget a pharh hnuah Social Welfare and Tribal Ministry atangin cheng vbc. 107, Tourism atangin vbc. 1,000, Sports-ah vbc. 1250 leh UD&PA-ah US dollar maktaduai 248, chu chu cheng vbc. 1800 hu vel hmuh a ni tawh tih a sawi a. Jal Shakti Minister-in cheng tam tak hu project a pawmsak thu tawngkain a hrilh tawh bawk tih a sawi a, chawlhkar khat chhunga central atanga project base a pawisa Mizoramin a hmuh chu cheng vbc. sang 5 a tling hrim hrim a ni, a ti bawk.
Hetihlai hian Opposition Group Leader, Lalduhoma chuan Budget pharh tak chu Budget duhthusam lo tak, lungsi lo taka pass ngai tur a nih thu a sawi ve thung a. Lalduhoma chuan Budget tha leh tha lo tehna hrang hrang atanga tehin Mizoram Budget chu a tha lo hle a, central atanga sum hmuh tur beisei tarlan pawh a tak takah chuan hmuh phak a beiseiawm loh a ni, a ti a, a bika Mizoramin duhsakna a dawn thin State Special Needs ang chi te, Kawng, leilawn leh building enkawlna tur sum te, ramngaw venhimna tur te leh Police Modernization Scheme te pawh budget-ah a lan takloh thu leh Special Category pawh nuaibo vek a ni tih sawiin, “Tui bill, electric bill, Hospital bill te thlengin a pung dawn tih a chiang a ni,” tiin Mizoram in Finance Minister tha a mamawh a ni, a ti bawk.

Comments

Chhiar Hlawhte