MUP Serchhip South Area Conference MUP Serchhip District President in a hmanpui

Mizoram Upa Pawl (MUP) Serchhip South Area chuan nimin khan Conference hmangin he hun hi MUP Serchhip District President, CL. Ramngaia chuan a hmanpui a ni.
MUP Serchhip South Area Conference hi Lalpuithanga Hall, Serchhip Chhim Veng-ah neih niin an President, T. Rokima chuan a kaihruai a, he hun hmanpuitu MUP Serchhip District President, CL. Ramngaia chuan MUP Serchhip District huamchhunga Area hrang hrang zingah Serchhip South Area chu hma la tha leh a nung ber pawl nia a hriat thu sawiin, an member boral te ral chungchangah pawh rualkhai taka an kal nia a hriat thu a sawi a. MUP ten thuvawn-a an neih, ‘Mite tana malsawmna nih’ tih chu thil harsa tak turah a lo ngaih thin thu sawiin, amaherawh chu MUP member ten Annual Fee leh Charity Fund an khawn thin te tha taka an pek chu natna khirh tuartu leh chhumchhia zawkte tanpuina atana hman thin a nih thu sawiin, hei hi midangte tana malsawmna an nihna leh midangte an tanpuina a ni tih hre reng turin a chah bawk.
Hei bakah hian MUP Serchhip District President chuan Mizoram-a Upa Pawl lo indin chhoh dan sawiin, kum 1957-ah Upa Lengkhawm chu sawrkar hnathawk pension mi thenkhat ten dinin, hemi hnu kum 1961-ah ‘Zoram Upa Pawl’ tia thlak lehin hemi hnu hian Mizoram Upa Pawl (MUP) hming an put leh tak thu leh Mizoram-a NGO pawimawh ber te zing ami, sawrkar-a inziaklut thlap an nih thu a sawi a. MUP member chu a tui leh duh nazawng tana nih theih a nih loh thu pawh sawiin, he pawl-a tel tur hian kum 60 tlin a tul avangin he pawl a tel thei te chu an vanneih zia leh Pathian malsawmna an dawn nasat zia hre reng turin a chah bawk.
MUP Serchhip South Area Meet-ah hian nikum March thla hnu lama an member boral mi 16 te sunna hun hman niin an huamchhunga Unit hrang hrang 7 atangin Report ngaihthlak a nih bakah Area Report pawh ngaihthlak nghal a ni a. Chawhnu lamah an huamchhunga MUP Unit hrang hrang ten Zai-a intihsiakna neiin result puanna leh lawmman semna neih nghal a ni bawk. MUP Serchhip South Area-ah hian MUP Unit 7 a awm mek a, heng te hi Darnam Unit, Dinthar Unit, Chhim Veng Unit, Ramthlun Unit, Field Veng Unit, Saron Unit leh Vengchung Unit niin member mipa 269 leh Hmeichhia 345, an vaiin 614 an awm a, kum 80 chunglam mi 68 an awm bawk.

Comments

Chhiar Hlawhte