Tuirial Hydel Project chu nitin kawlphetha MW 19.65 pechhuak anga chhut a ni

Tuirial Hydel Project chu hawn a nih atangin hman chhunzawm zel a ni a, hawn a nih atanga nikum December ni 31 thleng khan chawhrualin nitin kawlphetha MW 19.65 pechhuak ang a ni.
Mizoram Legislative Assembly thutkhawm neih mekah Lalrindika zawhna chhangin P&E Minister R. Lalzirliana chuan, Tuirial Hydel Project hawn tirh ni (date of commissioned) atanga nikum December 31 inkar chhung hian chawhrualin nitin power 19.65 MW pechhuak reng ang a ni, a ti a. “Mizoram sawrkarin Tuirial HEP atanga power siam chhuah zawng zawng atanga chhuta za zela 12% chu a thlawnin a dawng thei a. He project atanga power siam chhuah hi Mizoram sawrkarin a thlawna a dawn bak zawng zawng pawh a lei thin,” a ti a. “He project hawn (commissioned) a nih atanga ni 31.12.2019 thlenga Mizoramin Power Unit a lei tawh zat chu 324.32 MU a ni a, hemi atana pawisa a sen tawh zat chu cheng nuai 16113.63 a ni,” a ti bawk.
P&E Minister chuan Prof. F. Lalnunmawia zawhna pawh chhangin, “132KV Sub-Station Melriat atanga Falkawn (Zoram Medical College, Falkawn) Power-a chawmna tur chu peih tawh niin power pawh pek tawh a ni a, Melriat chawmna tur erawh hi chu March, 2020 thla chhunga zawh hman tum a ni,” a ti a. 132KV Sub-Station hian ruahmansa ti buai lovin Hualngohmun leh Muallungthu inkar khuate pawh a chawm thei dawn nia sawiin, Zoram Medical College Power pekna tur Project/Scheme pumpui zawhfel hunah 132KV Sub-Station, Melriat atang hian chawm an nih tur thu a sawi bawk.
Eptu member Lalduhoma zawhnapawh chhangin P&E Minister chuan, “Kum 2018-19 chhunga Transmission leh Distribution Loss chu 16.52% anga chhut a ni a. Power lakluhna leh semdarhna hmanrua conductor leh transformer-ah te hian loh theih lohin Electrical Power engemaw zah a kalral ve thin a. Heng loss te hi electric semdarhna hmanrua conductor len leh len lohte, a thui leh thui lohahtea innghat a ni,” a ti a. “Khawchhunga Power semdarhna hmanrua, Distribution Transformer dahna hmun leh a chawmtu line kalna kan nei tam tawk thei lo a. Chuvangin, Low Tension (LT) Line thui tak tak hmanga power semdarh a ngai thin a, hei hian Loss a tih tam phah a, chumai bakah power mamawhna lo pung zel mil turin conductor lian zawka thlak leh line siam belh te sum harsatna avangin a theih mai loh thin a, hengte avang hian Transmission leh Distribution loss hi a tam phah a ni,” a ti.
P&E Minister chuan an ram chhunga Power plant, tun February 2020-a function theite leh tunlaia an power pekchhuah zat pawh sawiin, Khawiva-ah 0.53 MW, Teirei-ah 0.60 MW, Kau Tlabung-ah 1.0 MW, Serlui ‘B’-ah 3.72 MW leh Tuirial HEP-ah 20.65 MW te an ni.

Comments

Chhiar Hlawhte