Chapchar Kut hman turin rel

Serchhip-a Chapchar Kut hman dan tur ngaihtuahin nimin khan Chapchar Kut Organising Committee chu District Bawrhsap, Dr. Lalzirmawia Chhangte hovin an thukhawm. He thut-khawm Serchhip DC Conference Hall-a neih ah hian Bawrhsap chuan Chapchar Kut chu Zofate tana Kut pawimawh ber a nih avangin a theih ang tawka ropuia lawm theih tha a tih thu a sawi a. Kumin atan hian sawrkar in Kut lawm nan cheng nuai 3 a pek tur thu sawiin, mawhphurhna hrang hrang changtuten theihtawp chhuaha an hma theuh hlen tumin, Kut hlimawm tak hman tum turin mawhphurhna changtute a fuih a. Serchhip mipuite pawh Kut tura lo inbuatsaih lawk turin a ngen a ni.

Kumin hian Chapchar Kut hi March 6 a hman turin sawrkar chuan a ruahman a, amah-erawh chu nimin a thukhawm hian Serchhip-ah chuan remchan zawkna avangin March 27, 2020-ah Chapchar Kut hi Leisekawt Mual-a hman nise tiin a rel a, Kut Pa atan Deputy Commissioner, Serchhip chu ruat niin Chapchar Kut hman dan tur Programme kimchang zawk hi Sub-Headquarters YMA te duan tura dah a ni a, chanvo nei thei turte pawh a tul anga lo ngaihtuah tura tih an ni bawk.

Serchhip Sub-Hqrs. YMA hian March thla tir khian Chapchar Kut hman dan tur hi rel turin ruahmanna an siam a, Branch YMA tan Cheraw (Kantluang) leh YMA Chhang tan Tlang Lam te chu entir tura thlan a ni tawh a ni.