Home Minister in Serchhip-ah International Paragliding Accuracy Championship a hawng

Khawvel pum huap Para-Gliding intihsiakna, International Paragliding Accuracy Championship-2020 chu nimin tlai khan Serchhip-ah neih tan niin Home Minister, Lalchamliana chuan he intihsiakna hi na hawng a, tunkar Inrinni khian zawhfel a ni ang.

Serchhip Tourist Lodge Tual-a Fédération Aéronautique Internationale (FAI), Category-II International Paragliding Accuracy Championship hawnna hunah hian Home Minister, Lalchamliana chuan khawvela Adventure Sports ngaihhlut hlawh Paragliding tih theihna tur hmun tha tak mai Mizoram in kan neih avangin lawmawm a tih thu a sawi a. Adventure Sports chu huaisenna min petu, harsatna su ngam tura min tichaka min tichhel thei Sports a ni a, taksa leh rilru hriselna atana infiamna pawimawh tak a nih avangin a hlu a, a ti thinte pawh an ngaihsanawm a ni, a ti a. An intihsiakna tur te chu dan hnuaiah, inzahtawnna leh infiammi rilru thianghlim tak pu chunga bei tur leh chetsualna awm thei lakah fimkhur tura ngenin hlawhtlinna chang theuh turin duhsakna a hlan a, he intihsiakna a hlawhtlin theih nana tha thawhtute zawng zawng chungah lawmthu sawiin, a bik takin Sports Minister, Robert Romawia Royte inpekna leh theihtawp chhuahnaah lawmthu a sawi bawk.
He intihsiakna hawnna hun hi Tourism Department Director, V. Lalengmawia chuan kaihruaiin Adviser to Chief Minister, C. Lalram-zauva pawhin mihringte remruat chhuah leh rawt puitlin theih ni hauh lo, Paragliding tih theihna hmun remchang leh tha em em mai Serchhip a Pathian in a dah chu lawmawm a tih thu a sawi a, intihsiakna hlawhtling tak a awm theih nana tha thawhtute zawng zawng chungah lawmthu a sawi bawk.
He hunah hian Mizoram Aero-Sports Association (MASA) President, J. Vanlalliana chuan report pein he intihsiaknaah hian tel tum mi 67 vel in register mah se, nimin-a Pilot rawn thleng tawh hi mi 25 niin lo kal mek hi 4 vel an awm a, Foreign Pilot hi South Korea, Afghanistan leh Kazakhstan atangin an rawn kal a, Vawiin atang hian intihsiakna hi neih a ni dawn a ni.

Comments

Chhiar Hlawhte

Serchhip-a YMA Branch hrang hrang kum 2020 HRUAITU TE