CM in Press mite kawm

Mizoram Chief Minister, Zoramthanga chuan nimin a Mizoram Budget tur Assembly House a a pharh hnuah thuthar thehdarhtute kawmin budget-in beisei ang pha lo mah se, kum kal meka budget aiin vbc 22.70 in a tam tho tih a sawi a.

Special Assistance-a hmuh theih tur vbc. 15,000 vela awm thu leh hei hi a chuh chak chak leh la chakte tan a ni dawn tih sawiin, “A tam thei ang lak kan tum dawn a ni,” a ti a. Central sawrkarin mahni ke-a ding ve tawh tura State te a nawrna kal zelah, Mizoram pawhin theihtawp a chhuah ve a ngai tih a sawi a. Mipuite phurrit lian siam zawnga chhiah lak tum a ni lo a, tlem tlema tihsan deuh ngaite chu a awm thei ang, a ti.

Chhiah hmu tha tura tan lak chu State sawrkarin sum hmuh belh a tumna lian tak a ni tih a sawi a. Chhiah khawn (Tax Collection) ah nasa taka tan lak tuma  ni, a ti. Sawrkar hmasa lam NLUP tanpuina an sem chu chawfun ang chauh a nih thu sawiin Chief Minister chuan, tuna Mizo-ram sawrkar flagship programme, SEDP chu mipuiten sum tam zawk an thawhchhuah theihna tura buatsaihna a ni tih a sawi a, chawfun chauh nilo, an thawh tur ngaihtuah tel chunga kalpui tur a ni dawn tih a sawi bawk a. Budget thar ah hian PAHOSS atan vbc. 10 dah niin MLA Fund ah cheng vbc. 60 leh Autonomous District Council pathum tan vbc. 451.06 dah a ni bawk.