Kum 2020-2021 Mizoram State Budget cheng vbc. 10,08.01 chu House-ah pharh a ni

Finance changtu Chief Minister Zoramthang chuan Assembly Budget Session neih mekah nimin khan kum 2020-2021 atana Mizoram Budget Estimate chu House-ah a pharh a, Mizoram Budget hi a vaiin cheng vbc. 10,081.01 a ni a. Tun tumah hian budget hlawk leh duhthusama tha an beisei thei dawn lo tih a sawi.

Chief Minister, Zoramthanga hian Budget pharh paha a thusawiah kumdanga aia thla khat laia hmaa Budget Session neih chu Parliament-a Union Budget pharh hnung zui a nih piah lamah, sawrkar pawisa kum (Financial Year) tawp dawna hnawhsarum taka sum hmanral thin tihtlem tumna a ni, a ti a. “January 2020 thla tawp atang khan Budget Allocation siam belh a ni ta lo a, Department-te tan pawh kum tawp dawn tepa sum tam tham tak hmanral kha a remchang dawn tawh lo a ni,” a ti. Tun tumah hian budget hlawk leh duhthusama tha an beisei thei dawn lo tih sawiin, Mizoram State Budget ruangam chu Finance Commission ten rawtna an siam danah a innghat thuk hle tih te, tunhnaiah Union Cabinet-in 15th Finance Commission term a pawhsei thu te, anni hian 2021-2022 atanga 2025-2026 atana Interim Report an thehluh tawh thu te, sawrkar laipui pawhin he report zulzuia budget a buatsaih thu te a sawi bawk.
Finance changtu Chief Minister, Zoramthanga chuan thil lawmawm tak pakhat chu kan State sum thawh chhuah bik (state own revenue) a kan hmasawnna chu a nih thu sawiin, “Kum kal lai mek Budget a kan thawhchhuah tura ruahman kha a hma kum ami aiin 27.97%  in kan san chho dawrh a, khatih hun lai kha sawrkarin Zu zawrh phalna kan tihtawp tantirh lai a nih avangin sum lakluhna pakhat awm dawn ta lo nen, khatiang Revenue Estimate sang kha a takah kan hmuh theih an ringlo a, mahse theihtawp kan chhuah a, December 2019 thlenga kan Revenue hmuh zat chu cheng vbc. 836.39 a kai chho a, chu chu kan beisei zat atanga 83.16% a ni tawh,” a ti bawk.
Chief Minister in Mizoram Budget a pharh takah hian State's Own Tax leh Non-Tax hnuaia sum hmuh tur belhkhawm chu cheng vbc. 1244.76 a ni dawn a, kum kal mek Budget Estimate atanga a punna 20.50% a ni. Sawrkar laipuiin nakum 2020-21 chhunga kan hmuh tura a rawn tarlan chu cheng vbc. 3967.96 a ni a, kumin Budget Estimate atangin 2.13% in a pung a, kumin aia 10% a sang kan beisei laiin kan dawn tur a hniam ta hle tih Chief Minister chuan sawiin, Fifteen Finance Commission in kan state sawrkar tana Grants a ruahman chu vbc. 1968 a ni a, kum kal meka kan sum hmuh tur aiin vbc. 748.00 laiin a hniam a, Grant dang dang atangin vbc. 185 kan dawng dawn a, tichuan kum 2020-21 chhunga Revenue receipt hmuh tura ru-ahman zat chu cheng vbc 9784.96 a ni, a ti.
Hmun hrang hrang atanga sum puk tura ruahman zat vbc. 875.03 a ni a, Revenue Receipt leh Capital receipt atanga sum hmuh beisei zat chu cheng vbc 10715 a ni a, kum kallai mek aiin cheng vbc 22.70 in a sang a. A hmanna lamah Revenue Expenditure atana sum hman tur ruahman zawng zawng chu cheng vbc. 9021.85 a ni a, hei hi Budget Estimate pumpui atanga 84.20% a ni a. Capital Expenditure atana sum ruahman zawng zawng chu cheng vbc. 1693.15 niin chu chu Budget Estimate pumpui atanga 15.80% a ni. Kum 2020-21 atana Revenue Section leh Capital Section atana sum hman tura ruahman zawng zawng chu cheng vbc 10715 a ni tih a tarlang bawk.
Finance Minister hian kum kal mek 2019-2020 sum indaihlohna cheng vbc 3393 chu House pawmpui atan a pharh nghal bawk a. Mizoram Budget Session neih mek hi Vawiin chawlin naktuk-ah chhunzawm leh a ni dawn a, karleh Thawhtanni atangin Budget a tlangpui a sawihona hi neih tur a ni ang.

Comments

  1. Tun tum (27/8/2020) a VC inthlan awm tura beisei a nita a, hetah hian Asesembly Session ah budget an pharhah khan VC te sum hman turah khan cheng engzat chiah nge dah a nih le?

    ReplyDelete

Post a comment

Chhiar Hlawhte