Lenkawl

Kar kalta tawp lama Aizawl atanga rukbo nia hriat Scooter (Scooty) pahnih chu nimin khan Serchhip-ah man niin a rutu nia hriat mi pahnih te pawh man nghal an ni bawk.

Naktuk October 1, 2024 hi ‘National Voluntary Blood Donation Day’ niin he ni pual hian Inrinni khan Serchhip-ah thisen pek pawimawh zia inzirtirna leh a thlawna thisen pekna hun buatsaih a ni.

Tunhnaia Serchhip Veng pakhata ruihhlo ngai nia rinhlelh thalai engemawzat a ruala an vak Social Media a video darh (viral) chungchanga hmalakna kal zelah ruihhlo do chungchanga hma la turin Serchhip Addl. SP kaihhruaina hnuaiah Working Committee din a ni.

Agricultural Technology Management Agency (ATMA) Serchhip District buatsaihin Inrinni khan Serchhip District chhung Leng khuaa chhungkaw thlanchhuah te tan Nihawichi (Sunflower) chin dan leh enkawl dan zirhona neih a ni a, he hun hi ATMA-a Block Technology Manager C. Lalremruata chuan kaihruaiin Nihawichi chin dan a zirtir nghal a, heng chhungkaw 16 te hnenah hian Nihawichi chin tur sem nghal a ni.

Serchhip District-ah kumin chhung hian ASF vanga Vawk thi leh suat nimin thlengin 10,194 a awm tawh. AH&Vety Department chhinchhiah danin nimin khan Chhiahtlang-ah ASF vanga Vawk thi 7 leh Baktawng-ah 2 bakah New Serchhip North-ah pakhat te chhinchhiah leh a ni a, heng bakah hian Chhiahtlang-ah hian Vawk 10 suat niin Baktawng-ah 8, New Serchhip North-ah 7, Ser-chhip P&E Veng-ah 3 leh Chhuanthar Tlangnuam leh Serchhip Kawnpui North-ah  pakhat ve ve suat leh a ni bawk a. Heti hian Serchhip District-ah ASF vanga Vawk thi 3366 leh Vawk suat 6828, a vaiin Vawk 10,194 chan a ni tawh a ni.

Lunglei North Bialtu MLA leh Lunglei High Powered Committee (HPC) Vice Chairman V. Malsawmtluanga chuan Inrinni khan a bial chhung Zote South (Serchhip District) khawtlang tan Electric Transformer 250KVA a hlan a, Zote South khua hian Transformer 100KVA hmangin hei hi a chhiat avangin Sept. 15, 2024 zan atang khan eng an nei tawh lova. Bialtu MLA hian a theih anga hma lak sakin MLA Fund-a rulh leh turin transformer 250KVA hi a leisak a. Hemi rual hian Zote South khua ah hian mipui ten an mamawh an thlen theihna turin Public Interview hun a hawng bawk a ni.

Mizoram Larsap Dr Hari Babu Kambham-pati damloh avanga a inenkawl chhung Governor hna hmui tura ruat Tripura Larsap Indra Sena Reddy Nallu chu Vawiin Sept. 30, 2024 chawhma dar 10:00 hian Mizoram Larsap atan lakluh a ni dawn a, Dr. Hari Babu Kambhampati hi a dam sam loh avangin tun thla ni 10 khan Hyderabad-a Star Hospital-ah admit a ni.

Home Minister K. Sapdanga chuan Inrinni khan Khawzawl-a Superintendent of Police (SP) Office tlawhin thawktute nen harsatna awm leh hmalak zel dan tur an sawiho a. Home Minister chuan tunlaiah Social Media a chak em em a, thudik leh dik lo pawh hriat hran har khawpin thil kan thehdarh thin a, hei hian mipui ah tul miah lo a buaina thlen chang a nei thin tih a sawi a. Police te chuan Ruihhlo leh Kuhva chu tunlaia an buaipui ber a ni tih sawiin, “Ruihhlo in kan thalai te nun nasa taka a tihchhiat avangin thapui thawha kan do a ngai takzet a ni,” tiin Police chakna ringawt chuan ven a harsat avangin NGO hrang hrangte thawhpui thiam a pawimawh thu pawh a sawi bawk.

Aizawl Judicial District huamchhunga District Bawrhsap leh Superintendent of Police (SP) te chu Inrinni khan District Judge hova thu-khawmin thil pawimawh hrang hrang an sawiho a. District Court Aizawl-a District Judge Meeting Room-a thutkhawm hi kum 2013-a Gauhati High Court Notification-in thla tin huaihawt thin tura thu a pek anga neih niin Jail thawmthat te, Jail-a Medical Officer dah belh te, hnuchhui leh Court-a kalpui zel dan chungchang te, Criminal Law thar te, Search & Seizure chungchang te leh Electronic Evidence lak dan te sawi a ni a. Aizawl SP Rahool Alwal chuan e-Sakshya Application chungchangah Presentation a pe bawk. Heng bakah hian Court leh Police te thawhho dan sawi a ni a, DC te nen pawh Guardianship chungchang sawi a ni bawk.

Art & Culture Minister C. Lalsawivunga chuan Zirtawpni khan Union Minister for Culture Gajendra Singh Sekhawat chu Delhi-a a chenna-ah hmuin thil pawimawh hrang hrang a sawipui.

Hindu pawl pakhat Shankaracharya of Jyotirmath Peeth in Mizoram-a Bawng talh lo tura beihpui thlak an tumna chu Mizo Zirlai Pawl (MZP) atanga dodalna a nasat avangin Zirtawpni kaltaa Lengpui Airport-a Private thlawhna hmanga an lo tum hnuah an thlawklet leh nghal.

Central Young Mizo Association chuan Khawtlanga sualna pun lun chungchangah Sub-Headquarters, Group leh Branch YMA te chu tihtawp-a tan la turin a ngen.

September, 2024 atanga Mizoram sawrkarin ruang phurhna rate a bituk chu ruang phurtu Ambulance-ten an pawm theih loh avangin sawrkar rate thar siam hi hman theih a la ni lo a. Ruang phurhna rate thar siam tur hian State Transport Authority (STA) chuan hma an la mek.

Commonwealth Parliamentary Association (CPA), India Region, Zone-III Annual Conference vawi 21-na chu Inrinni khan chhunzawm leha zawhfel a ni.

Khawvel hmun dangte rualin Inrinni khan ‘World Rabies Day’ pualin Aizawl Khatla-a Hotel Royale Lalawi-ah 'Breaking Rabies Boundaries' tih thupui hmangin hun hman a ni a, he hun hi Health Minister Lalrinpuii chuan a hmanpui a ni.

Food, Civil Supplies & Consumer Affairs (FCS&CA) Minister B. Lalchhanzova chuan National Food Security Act (NFSA) hnuaia hamthatna dawng tur thlan chungchangah ngaihtuahna thar sen mek a ni tih a sawi.

Kum 2023-24 chhung khan Mizoram-ah Ui seh (dog bite) case 1,077 a awm a, thi erawh an awm lo.

 

Chawngbuangi Memorial School, Serchhip-a Bharat Scouts & Guides te chuan niminpiah atang khan zan khat awh Camp Programme hmangin nimin khan Bawrhsap Paul L. Khuma chuan a hmanpui a ni.

Rampum-a Poshan Maah (Nutrition Month) hman mek denchhenin nimin khan Serchhip-a Women & Child Development Department-a District Programme Office chuan Serchhip-a Anganwadi Centre te tan ‘Fruit Festival’ an buatsaih.

Nimin khan Serchhip District-ah ASF vanga Vawk thi chhinchhiah khaw pakhat-ah chiah a awm a, khaw pali-ah vawk suat chhinchhiah a ni thung.

AIR leh DDK thawktute chuan nimin khan thuthar thehdarhtute hmaah a thlawna chanchinthar, thuziak leh thlalak bakah video an lakchhawn theihna tura duan, PB-SHABD chungchang an sawifiah.

Lok Sabha Speaker Om Birla chuan State hrang hrangin Assembly thutkhawm an neih chin tur bithliah zat dan anga awmsa chu an zawm tur a ni tih sawiin, Assembly neih zat tur a tlem ber anga duan zat tal zawm vek a pawimawh tih a sawi.

Mizoram Governor Dr. Hari Babu Kambhampati chuan chawlh a lak avangin chawlh a lak chhunga Mizoram Governor hna lo thawk lailawk turin Tripura Governor nilai Indra Sena Reddy Nallu chu President Droupadi Murmu chuan a ruat a, Rastrapati Bhavan chuan hemi chungchang ah hian hriattirna a tichhuak tawh a ni. Tarlan tawh angin Dr. Hari Babu Kambhampati hi khawsik avangin Hyderadad-a Star Hospital panpui a ni a, Doctor ten an enfiah hnuah a Chuap lamah harsatna a awm tih hmuhchhuah a ni.

Karleh Thawhtanni, September ni 30, 2024 khian Mizoram pumah Mim Kût, 2024 hman a ni dawn a. He Kût hian Mizote hnam ziarang leh nunphungte entira a chawilar avangin Mizoram Sawrkar hnuaia thawktu zawng zawng leh State Sawrkar hnuaia Public Sector Undertaking, Board, Body leh Agency hrang hrangte chu September ni 30, 2024 hian Office hun chhunga Mizo thuam inbel turin General Administration Department (GAD) chuan a ngen.

Irrigation & Water Resources Department Staff Welfare Association of Mizoram (ISWAM) chuan nimin khan Aizawl-a IWRD Auditorium ah General Body Meeting vawi 8-na neiin IWRD Minister PC. Vanlalruata chuan a hmanpui a, an hmalakna hrang hrangte ngaihthlak niin Member zinga kaisang lawmpuina te, Member thar lawmluhna hun leh kum 2022-24 chhung a member boral mi 6 te sunna hun hman a ni bawk. IWRD-ah hian Chief Engineer Office, Lunglei Division, Kolasib Division, Champhai Division leh Aizawl Division awmin thawktu hi mi 120 an awm a ni.

Home Minister K. Sapdanga chuan nimin khan Dungtlang Police Station tlawhin thawktute nen inkawmin venhimna kawnga hmalakna tha zawk neih dan tur an sawiho a, Police-te chu ram venhimna kawnga hmahruaitu an ni tih in hre reng tura chahin, Dan leh thupek kenkawh kawngah hna an thawh chak theih nan khawtlang leh tlawmngai pawl hruaitute nen inlaichinna tha neih a pawimawh tih hre reng turin a chah bawk. Dungtlang Police Station hi January 9, 2020 khan din a ni a. Tun dinhmunah thawktu mi 11 - Sub Inspector 1, Asst. Sub Inspector 1, Head Constable 2, Constable 5, Naik 1 leh Driver 1 an awm a. Kum 2024 chhungin thubuai 27 an ziaklut tawh a, ND&PS Act hnuaiah thubuai 4 ziakin Kuhva ro Quintal 135 an man bawk a ni. 

Lok Sabha Speaker leh CPA India Regional Chairperson Om Birla chuan nimin khan Mizoram Legislative Assembly Library-a Archive Cell thar chu a hawng a, Archive Cell hi Mizoram Assembly Speaker Lalbiakzama hmalakna-in Legislative Assembly sum remchang ang ang te pawtkhawma siam a ni a. Document hlui pawimawh tak tak, District Council hunlai a mi te dahkhawm niin uluk taka vawn a ni tawh dawn a. Mamawh hunah awlsam taka hman leh bih theih tura vawnthatna tur pindan a ni. 

Federation of Industries in North Eastern Region (FINER) bultumin nimin khan ‘International Conference on MSMEs in North East’ chu nimin khan Aizawl-a I&PR Auditorium-ah neih a ni.

Sialsuk khua chuan World Tourism Day 2024 denchhena a buatsaih ‘Best Tourism Village Competition 2024’ ah ‘Community Based Tourism’ ah lawmman dawngin nimin khan he chawimawina hi hlan an ni.

Kumin August 28-a Tlawng lui lian in Assam State huamchhung, Hailakandi District a Killarbak khaw bula Rel kawng a tihchhiat chu nimin khan Supply Minister B. Lalchhanzova chuan a hmunah tlawhin he Rel kawng siamthat hna hi Indian Railway lam chuan an thawk mek a ni.

Kolasib District chhunga National Highway 306 leh 06 thawmthat hna thawh mekah PWD chan chinah zaa 55 leh NHIDCL chan chinah zaa 45 velah hmalakna hmuh a ni tawh.

Commonwealth Parliamentary Association (CPA), India Region, Region Zone-III chuan nimin khan Mizoram Legislative Assembly Session Hall-ah Annual Conference vawi 21-na hmangin Plenery Session an nei a. An Chairman, Lok Sabha Speaker ni bawk Om Birla leh Rajya Sabha Chairman Harivash Narayan Singh te chuan an telpui a ni.

Serchhip Teachers' Association (STA) chuan nimin khan Serchhip Auditorium-ah General Assembly neiin an pawl kum 50 tlinna, Golden Jubilee lawmna kharna hun an hmang a, he hun hi Bialtu MLA leh Chief Minister Lalduhoma chuan hmanpuiin thalai tha zawk, taima zawk leh tumruh zawk chherchhuak turin Zirtirtute chu a chah a ni.

Serchhip DCPU hnuaia District Jail Inspection Team te chuan nimin khan Serchhip District Jail tlawhin kum 18 hnuailam tang an awm leh awm loh an enfiah a, he hunah hian Principal Magistrate Josangzeli Tlau MJS chuan Jail tang te fuihna thu sawiin, IPC 380 hnuaia Jail tang ngaihhnathiam theih thin chu dan thar, Bharatiya Nyaya Sanhita (BNS) of 2023 hnuaiah chuan thil ru, ru nawn leh te chu kum khat an tân ngei ngei a ngai tawh tih hrilhin, hetiang aia hremna an pe na lo a nih chuan anmahni zawk an insawifiah ve a tul thu a sawi a ni. Tun dinhmunah Serchhip District Jail-ah hian tang mipa 72 leh hmeichhia 4, an vaiin 76 an awm a, Serchhip District Jail a Staff Nurse chuan fa a neih avanga kumin December thla thlenga chawlh a lak avangin damlo enkawlna kawngah harsatna a awm thu leh a aiawh tur dah nise tha an tih thu te an sawi a ni.

Serchhip Teachers' Association (STA) in kumin August 23-a Serchhip Bial chhunga zirna In hrang hranga zirlaite tana inelna an buatsaih, ‘MLA Trophy (Inter School Challenge)-2024’ chu nimin khan result puanna leh lawmman semna neih a ni a, he intihsiakna hi nikum lamah neih ni tawhin kumin hian a vawi hnihna atan neih leh a ni a, Primary School atanga College/DIET zirlai thlengin Category 7-ah zirlai 140 an tel a ni. He intihsiakna a lawmman dawngtute chu :

Nimin khan Serchhip District-a khaw pali ah African Swine Fever (ASF) vanga Vawk thi 10 awm lehin Chhiahtlang leh New Serchhip North-ah pali ve ve leh Baktawng leh Serchhip P&E Veng-ah pakhat ve ve te an ni a. Nimin vek khan East Lungdar-ah Vawk 9 suatin Baktawng-ah 5, Chhuanthar Tlangnuam leh Serchhip P&E Veng-ah pakhat ve ve suat a ni bawk. Heti hian nimin thleng khan Serchhip District-ah kumin chhunga ASF vanga Vawk thi 3351 leh Vawk suat 6787 a awm tawh a ni.

Serchhip District chhung khaw hrang hrangah dan ang ni lova kuhva phur lirthei an kal thin tih hriat a ni a, hetianga dan phalloh a kuhva phurh hi Serchhip District-ah a rem theihna turin Serchhip District Magistrate Paul L. Khuma chuan Section 163 of Bharatiya Nagarik Suraksha Sanhita, 2023-in thuneihna a pek angin 'Serchhip District chhung khawi hmunah mah dan lova kuhva lak luh leh phurh phal a ni lo' tih thupek a chhuah a. He thupek hian thu leh awm hma chu Order chhuah ni, September 25, 2024 atanga thla hnih (2) chhung huamin thupek zawmlo te chu dan hmangin hrem theih an ni ang.

Serchhip District Bawrhsap chuan tun thla ni 24 khan thupek tichhuakin Halpuah leh halmawite chu nasa taka mihring hriselna a tichhe thei leh boruak a tihchhiat leh tihbawlhhlawh mai bakah ri bengchheng a siam thu a tarlang a. Silai lem mu nei chi te pawhin mihring piansualna a thlen tak fo bakah tul lova sum khawhralna a nih avangin heng- Halpuah, Halmawi, Sky Lantern leh puakthei thil dang bakah silai lem a mu hmang chi reng reng lak luh, zawrh, hralh, hal leh hman khapna thupek chu Section 163 of Bhartiya Nagarik Suraksha Sanhita, 2023 hnuaiah a chhuah a. He thupek hi mi tinin zawm theuh tur a nih thu leh thupek zawmlo te chu thuneitute hnena hriattir turin mipuite a ngenin a hriattir bawk.

Serchhip-a Excise & Narcotics Department chuan nimin khan Thenzawl-ah Sapzu, Royal Stag Whiskey (750 ml) um 36 bakah Kingfisher Beer (500 ml) can 192 leh Simba Beer (500 ml) can 24 an man a, a neitu nia hriat Evi Lalramhluni (33), Thenzawl Venghlun pawh manin MLP Act, 2019 hmanga thubuai siam sak a ni a, nimin khan Serchhip District Court-ah hruai nghal a ni.

Tunhnaia Serchhip-a Heroin lei tum mi tam tak inhawrkhawm nia Social Media lama lang chu Serchhip-a Excise & Narcotics Department te chuan chhui zui nghalin nizan hmasa dar 9:10 khan Heroin Hawng 5 zet an man a, a neitu nia hriat Lalengmawia (46), Serchhip P&E Veng nia insawi pawh man nghal a ni. Nizan hmasa a Heroin an man hi gram 65.52 a rit niin a neitu nia hriat hi manin thubuai siam sak nghal a ni.

Online Gas Book na tha tak INDIANOIL ONE Mobile Apps - Laldinpuia

Vawiin leh naktuk (Sept. 27 leh 28) hian Commonwealth Parliamentary Association (CPA), India Region, Zone-III Annual Conference vawi 21-na chu Aizawl-ah neih a ni dawn a, he hun hmang tur hian Lok Sabha Speaker Om Birla, Rajya Sabha Deputy Chairman Harivansh Narayan Singh leh Official pawimawh hrang hrangte chuan nimin khan Aizawl an rawn thleng a, Mizoram Assembly Speaker Lalbiakzama, Lok Sabha MP Richard Vanlalhmangaiha, Deputy Speake Lalfamkima leh Official dangte'n an lo dawngsawng a ni. Nizan khan  Mizoram Legislative Assembly Committee Room-ah Executive Committee Meeting neih nghal niin Vawiin hian Lok Sabha Speaker hian MLA Library-a Archive Cell thar chu a hawng nghal dawn a ni.

Home Minister K. Sapdanga chuan nimin zing khan Champhai Superintendent of Police Pisa tlawhin Champhai District Executive Force (DEF) hotute nen an inkawm a, Home Minister chuan Mizoram sawrkarin ruihhlo leh kuhva tawlhruk dona kawngah theihtawp a chhuah tih sawiin, kumin (2024) August thla thleng khan ruihhlo cheng vbc. 160 hu man a nih tawht hu leh a kaihhnawihah mi 355 man an ni tawh tih a sawi a. Sawrkarin ruihhlo leh dan phalloh thildang te a dona kawngah Mizoram Police te hnathawh a chhuan thu pawh sawiin, Sawrkar innghahna an nih angin Police-te chu thawkrim zel turin a fuih a. An hnathawhte beiseina sang tak nen an lo thlir zel dawn tih a sawi bawk. Champhai District-ah hian Police Station pathum - Champhai, Zokhawthar leh Dungtlang PS te awmin Hnahlan leh Farkawnah Beat Post a awm bawk a ni. 

Cambodia ram-a India aiawha Ambassador hna chelh turin B. Vanlalvawna IFS chu ruat thar a ni a, a hna thar hi zawm thuai tura beisei a ni. B. Vanlalvawna hi Indian Foreign Service (IFS) niin 1998 Batch a ni a, India sawrkar tan hna pawimawh hrang hrang lo chelh tawhin tunah hian sawrkar laipui-a Ministry of External Affairs ah Joint Secretary post a chelh mek a ni.

Environment, Forest & Climate Change Department chuan nimin khan an Department hnathawhte thlirletna, Mid-term Review of EF&CC neiin he hun hi EF&CC Minister Lalthansanga chuan a hmanpui a ni.

Nimin khan Education Complex Conference Hall, Mc Donald Hill-ah Education Consultant Rev. Dr. K.Thanzauva Office chu hawn a ni a, he hunah hian Education Minister Dr. Vanlalthlana chuan Mizoram sawrkar hnuaia Department lian tak enfel ngai apiang enfela rawtnate siamtu tur Consultant, Rev. Dr. K.Thanzauva a awm ta chu lawmawm a tih thu sawiin, Consultant chu mi chak, zirna lama tawnhriat nei tha leh tui tak a nih thu a sawi a. Mi harsa zawk te kan dawmkang dawn a nih chuan zirna siamthat chu a bulpui a nih thu sawiin, Zirna siamthatna kawngah tha nia an hriatah chuan huaisen takin an kal zel dawn a, dawihzepa pen ngam loh an tum lo tih a sawi a, an tisual palh a nih pawhin an insiam tta zel dawn a, tha nia an hriatah chuan an kal zel dawn tih a sawi bawk.

Kumin hian India rampumah ranvulh chhiarpui neih a ni leh dawn a, hemi atan hian AH&Vety Department pawh a inbuatsaih mek a ni.

Nimin khan Power Minister F. Rodingliana hovin a Pisa-ah Solar Rooftop Scheme, PM Surya Ghar Muft Bijli Yojana chu chak zawka kalpui dan tur sawiho a ni a, he sawihona hunah hian P&E Department Official-te leh Empanelled Vendor te an tel a ni.

Home Minister K. Sapdanga chuan Mizo Zirlai Pawl (MZP) Assembly vawi 68-na chu nimin khan Champhai Tlangsam-a Thanghlianga Sailo Run-ah a hmanpui.

Serchhip Kawlri tlang-a Heritage Site chu nimin khan District Bawrhsap Paul L. Khuma chuan tlawhin helai hmuna hmalakna kal mek te a enfiah.

United Pentecostal Church (UPC) North East India chuan nimin September 25, 2024 khan ‘Missionary Day’ an hmang.

Nimin khan Serchhip District-ah African Swine Fever (ASF) vanga Vawk thi khaw 4-ah chhin-chiah niin khaw pahnih ah Vawk suat leh a ni bawk.

Sawrkar laipui Ministry of Panchayati Raj, Govt of India chuan October 2, 2024-a Gram Panchayat Development Plan (GPDP) 2025-26 siamna tur atana People's Campaign nei tura Special Gram Sabha cum Orientation/Training Prog-ramme neihna tura ramchhunga khua 750 a thlang a, Mizoram atangin khaw pathum thlan niin Serchhip District atangin East Lungdar chu a tel a, hemi atan hian cheng nuai khat pek an ni ang.

Mizoram Tourism Development Authority (MTDA) chu nimin khan an Chairman leh Tourism Minister Lalrinpuii hovin SAD Conference Hall No. II-ah an thukhawm a, he hunah hian MTDA Annual plan, Budget leh MTDA thuamchakna tur hrang hrangte rel a ni. Nimin-a MTDA thutkhawm ah hian MTDA General Body Member 14 atangin Member 13, Department hrang hrang aiawhte an tel a ni.

Mizoram Chief Minister hmasa ber Ch. Chhunga hriatreng nana zirlai tithate hnena hlan thin, ‘Ch. Chhunga Mememorial Endowment Fund’ chu nimin khan Lalnunhlua, English & Cultural Studies Department, Mizoram University MA (English) Gold Medalist hnenah hlan a ni a, pawisafai cRs. 36,401 leh chawimawina thuziak a keng tel a ni. He Fund hlanna hun hi nimin khan Mizoram University-ah neih a ni.

Nimin khan Saitual-ah District Level Standing Committee on Rationalization of Polling Station chu an Chairman leh District Bawrhsap Dr. Lalngura Tlau hova thukhawmin mipuiten zangkhai leh tha taka vote an thlak theih nan Polling Sation thenkhat tih danglam rawtna te chu sawiho a ni a. 8-Chalfilh A/C hnuaiah Polling Station 7 awm ah 4 siam belh tura rawtna leh 9-Tawi A/C hnuaiah Polling Station 11 awm ah 4 siam belh rawtna chu ngun taka thlirho a nih hnuah pawm a ni a. Polling Station thar tinah hian BLO turte pawh ruahman nghal a ni bawk. He rawtna an siam hi Election Commission of India pawmpui tura thawn a ni ang.

Kolasib District-a Land Owners Association te chuan an ram chungchanga an thilphut te nawrna atan nimin atang khan Mizoram chak lakna NH. 06 leh 306 te chu an dang a, sawrkar in venhimna hna thawktu Police engemaw zat dah bawkin harsatna lutuk erawh a thleng lo a, nimin tlai dar 3:30 khan kawngpui dan hi tihtawp zui a ni. Thudawn danin Land Owners Association te thilphut hrang hrang chu nimin tlai khan Chief Secretary hova sawiho niin hei hi hlawh-tlinna ah an ngai tih Land Owners te chuan an sawi a, Supreme Court-in ram chungchang buaina chingfel tura State sawrkar a hriattir chu chak taka hmalak a ni tih an hriat thu leh Kolasib DC in a tul anga sawrkar-ah chak taka bawhzui a tiam avangin kawngpui dan hi tihtawp an remti a ni.

Nimin September 25, 2024 khan khawvel pumah Pharmacist-te ni, ‘World Pharmacists Day’ hman a ni a, he ni puala Aizawl-a hun hman chu Health Minister Lalrinpuii chuan a hmanpui a ni.

Mizoram Public Service Commission (MPSC) chuan Grade-III of Mizoram Judicial Service (Civil Judge Cadre) post pathum (3) atan thawk tur lak hna a kalpui mek.

Chief Minister Lalduhoma chuan nimin khan Champhai Tlangsam hmuna Champhai Grape Growers Society te Winery tlawhin Society hotute a kawm nghal bawk.

Niminpiah a Mizoram District hrang hrang 8-a Village Council 14-a by-election neih chu tluang taka zawhfel a ni..

Sawrkar laipui chuan kumin 2024-25 chhunga Mobile Veterinary Unit (MVU) Staff te hlawh tur za zela 25 (25%) chu a sanction.

Mizoram Rajya Sabha MP K Vanlalvena chuan Union Agriculture Minister Shivraj Kumar Chouhan chuan sawrkar laipuiin kuhva chin a khap loh thu a hrilh tih a sawi a, PM-KISAN Scheme hmangin Mizoram-a buh chingtute chu puih theih an nih thu a sawi bawk.

Chief Minister Lalduhoma chuan nimin khan Mizo Zirlai Pawl (MZP) Assembly vawi 68-na chu Champhai Tlangsam-ah khuallian nia hmanpuiin, Mizo Zirlai Pawl chu ram leh hnam rawngbawlna hmun, zirlaite kawng dik zawhtir tura hmalakna hmun a ni tih hre reng turin kalkhawmte chu a chah.

Rampum huap-a ‘Poshan Maah’ hmanna kal zelah nimin khan Serchhip ICDS Project buatsaihin Serchhip-ah ‘Fruit Festival cum Sale’ buatsaih a ni a, he hunah hian eitur chi hrang hrang mipuite hmuh leh lei theih tura phochhuah a ni.

Serchhip District chhung Village Council pahnih ah nimin khan by-election chu tluang taka neih a ni a, Serchhip Chhim Veng VC-ah Independent Candidate PC. Siamliana thlantlin niin New Serchhip North VC-ah ZPM Candidate H. Lalengzauva te thlantlin an ni.

National Service Scheme (NSS) Foundation Day vawi 55-na chu nimin khan Sports & Youth Services Minister Lalnghinglova Hmar hovin Aizawl-a Vanapa Hall-ah hman a ni a, State Level NSS Award for Volunteer dawng tura thlan C. Malsawmtluanga (Serchhip) hnenah Award hlan niin ‘NSS Annual Report 2023-24’ chu tlangzarh nghal a ni bawk.

Tun thla ni 29 thlenga hman tur, ‘International Week of the Deaf’ chu hman mek niin Serchhip District-ah pawh he Hapta hman chhung hian zirna In hrang hrangah ri hriatna tha lo chungchanga hriat tur pawimawh inzirtirna atan leh ri hriatna enfiahna hun atan hman a ni ang.

Serchhip District-ah kumin chhunga ASF vanga Vawk thi leh suat chu sing khat aiin a tam tawh.

 Indian Medical Association (IMA), Mizoram State Branch chuan Inrinni zana an Doctor pui Synod Hospital Durtlang-a thawk mek, Dr. Laldinliana Sailo leh Dr. Rinngheta Renthlei ten sawisak rawn an tawk chu an lungawiloh thu sawiin, a titute na taka hrem an phut.

Aizawl District Magistrate Er. Lalhriatpuia MCS chuan BNSS Section 163 (1) in thuneihna a pék angin Aizawl District huamchhungah halpuah, halmawi, sky lantern te lakluh, zawrh, hralh, hal leh hman khap tlat a nih thu thuchhuah siamin a tarlang a, he thupék bawhchhia chu BNS Section 223 hnuaiah hrem theih niin thupék hi tihtawi a nih loh chuan chhuah a nih atanga thla hnih (2) chhüng huam tur a ni ang.

Nimin khan Mizoram hmun hrang hranga Village Council 16-ah by-election chu tluang taka neih a ni a, Seat ruak pakhat awmna Khuangthing VC-ah ZPM Candidate chuhtu awm lova tlingin Nisapui VC-ah MNF Candidate chu chutu awm lovin a tling bawk a. Seat 5 awmna Chawngtlai VC-ah chuan inthlan ngai lovin insiamrem a ni a, VC dang zawngah nizan khan Vote tla te hi chhiar nghal a ni.

Mizoram sawrkar Flagship Programme, Handholding Scheme tlangzarh tak kalpui zelna turah Progress Partner-te puitu tur Sawrkar Department hrang hrangte tan ni hnih awh tur training chu nimin khan Aizawl-a Planning & Programme Implementation Dept. Conference Hall-ah neih tan a ni a, he hun hi Adviser to CM (Implementation of Handholding Policy) Dr. K.C. Lalmal-sawmzauva chuan kaihruaiin  Bana Kaih Scheme hi chhawr tangkaina leh hlawhtlinna atana Department te pawimawh zia a sawi a. Duhsak bik nei lo a kalpui tur Scheme a nih thu a sawi bawk a. Tun dinhmunah dilna thahnem tak a luh tawh thu a sawi bawk. Dilna lut te hi a kaihhnawih Department a Search Committee ten an zirchian hnuah Department Nodal Committee in an recommend ten Apex Body in a lo thlang ang a. Hemi hunchhung hi thla thum chhunga tihfel hman zel tur a ni.

Agriculture Minister PC. Vanlalruata chuan Sawrkar thar chuan kuthnathawktute a ngai pawi-mawh tih nimin-a Biate khua in Lo Zawh Runpui an neih a hmanpuina ah sawiin, thlaithar hralhna tur pawh ngawrh takin a buaipui mek a nih thu a sawi a. “Tunah pawh hian thlaithar chi li Sawh-thing, Hmarcha, Aieng leh Hmunphiah te a rate a bituk mek a. Sawrkar chuan heng thlai thar rate a siam aia tlawma kuthnathawktuten an hralh dawn a nih chuan Sawrkar an lamah a tang tlat dawn a, Support Price a pe dawn a, a ai to zawka hralhna tur an hria a nih chuan Sawrkar a inrawlh kher pawh a ngai dawn lo,” a ti a. Lo neituten man man zawka an dehchhuah an hralh theihna tur leh an thawhrimrah senga an lo dinchhuah theihna tur chu Sawrkar chuan a ngaituahpui ber tih sawiin, “Kalphung thar mipui Sawrkar hnuaiah chuan kuthnathawktute tan kawl a eng ve tawh dawn a ni,” a ti bawk. Biate khua in Lo Zawh Runpui an neih hi Bialtu MLA Lalmuanpuia Punte pawhin khual zahawm niin a hmanpui bawk.

Mizoram State Commission for Women (MSCW) Chairperson C. Lalchhandami’n bânna a thehluh chu pawmsak a ni a, a ai lo awh lailawk turin Commission Member ni lai K. Lalremruati chu ruat a ni.

School Education Minister leh Aizawl North-II Bialtu MLA Dr. Vanlalthlana leh Land Revenue & Settlement Minister B. Lalchhanzova te chuan nimin zing khan Aizawl Ramhlun Sports Complex-a sawrkarin ram a lo theh tawh chu tlawhin khawtlang hruaitute an kawm.

MNF General Secretary K. Lalsawmvela chuan nimin khan Aizawl Press Club-a thuthar lakhawmtute kawmin kum 2018-a MNF an sawrkar hlim khan kawng a chhe hle a, Congress Sawrkar-in pawisa an hnutchhiah ang ang hmanga siamthain kum 5 chhung khan kawng chhe lutuk awm lovin an awm thei tih a  sawi a. Tun Sawrkar-ah erawh Thal laiin sawrkar muthlu in, Fur-ah kawng nasa taka a chhiat hnuah Fur ruahtui tam laiin kawng a repair theih loh tih sawrkar chuan an sawi ta niin a sawi bawk.

Nimin khan Lawngtlai District-ah a thawh hnihna atan 'Citizen Care- Grievance Redressal Day' (Khua leh tuite Ngaihsak-Harsatna Chinfel Ni) hman leh a ni.

Mizoram Youth Commission (MYC) kaltlanga Spa therapy training tur mi 7 (pasarih) te chu nimin khan Aizawl-ah thlahna hun hman a ni.

Mizoram-ah Ayushman Card/Golden Card 5,65,428 siam ni tawhin he Scheme hi mipuite'n a thlawna damdawi In-a inenkawl nan tum 1,12,000 an hmang tawh.

Kawlphetha renchem leh awmze nei zawka hman tangkai a nih theih nana hmalakna ‘Demand Side Management Project’ chu nimin khan hawn a ni.

Serchhip District chhunga Village Council pahnih-a General Seat ruak pakhat ve ve awm ah Vawiin hian by-lection neiin Vote thlak a ni dawn ta.

Serchhip District-ah nimin khan ASF vanga Vawk thi 8 chhinchhiah niin Vawk suat 4 a awm belh bawk.

Mizoram-a tuialhthei kawnga harsatna awm chu ziaawm zelin Serchhip-ah pawh Vawiin lam hian Petrol leh Diesel rawn thleng tura beisei a ni.

Mizoram State NSS Officer cum Deputy Secretary chuan Govt. Serchhip College Principal hnenah lehkha thawnin he College-a NSS Volunteer C. Malsawmtluanga s/o C. Rameng-mawia, Tuikhuah Veng Serchhip  chu kum 2023-2024 atan ‘State Level NSS Award for Volunteer’ dawng tura thlan a nih thu a rawn hriattir a, he Award hi Vawiin-ah Sports & Youth Services Minister Lalnghinhlova Hmar chuan a hlan ang. He Award hian Certificate leh Trophy bakah pawisafai Rs. 10,000/- a keng tel a ni.

Lawngtlai District-a Tlawmngai pawl lian ber, Young Lai Association (YLA) chuan nimin khan an kum 50-na, Golden Jubilee an lawm a, Central YLA hruaitute chuan Lawngtlai-a Damdawi In pathum bakah Lairam Rescue Centre, Lairam Motherless Home leh District Jail-ah te thilpek an hlan a, nizan khan hmun hrang hrangah Jubilee Mei det a ni bawk.  YLA-ah hian Branch 119, Sub-Hqrs. 7 leh Group 2 awmin Member 56,000 an awm mek a ni.

Kolasib District Land Owner’s Association Joint Action Committee chuan sawrkar a an thilphut hrang hrang tih hlawhtlin an ngiatna kal zelah naktuk Sept, 25, 2024 zing dar 6:00 atang hian thu leh awm hma chu NH 06 leh 306, Silchar to Aizawl Road chu danpin an tum a, Silchar lam pana lirthei ruak chhuk turte chu naktuk zan dar 12:00 thleng tlan phal a ni anga. lirthei dan turin a huam loh zingah Mizoram chhunga Maxi Cab Service te a tel a ni.

Nimin khan Kolasib DC Conference Hall-ah District Level Task Force on Ruihhlo do chu thukhawmin an hmalak tawhna leh hmachhawp te an thlirho a. Ruihhlo dona kawnga hmalakna atan hian kum 2023-24 atan an District hian cheng nuai 7 dawng tawhin tun dinhmunah District chhung hmun hrang hranga hmalakna atan cheng nuai hnih hman a ni tawh a ni.

Nimin khan Lunglei-ah District Level Advisory Committee on Safe Food & Healthy Diets chu thukhawmin ei leh in hrisel leh thiang-hlimna kawnga hmasawn theihna tur ruahmanna hrang hrang sawiho a ni a. October 2024 chawlhkar khatna ah tehfung hrang hrang hmangin ei leh in siamna hmunte endik nise an ti a, October 2024 chawlhkar hnihna chhungin ei leh in siamtu Hotel, Restaurant, Bakery leh Catering neitute tan ei in hrisel leh thianghlim siam leh zawrh chungchang inzirtirna, Sensitisation Workshop buatsaih tum nise an ti bawk.

State Level Committee on SASCI chu nimin khan CM Conference Hall-ah an Chairman leh Chief Minister Lalduhoma hova thukhawmin Part X of SASCI, 2024-25 atanga hmun pasarih-a Working Women Hostel sak dan tur an rel a. Hemi atana PWD lamin ruahmanna an siamte sawifiahin a vaia sum sen tur zat hi cheng vbc. 127 a ni. SASCI Part X hnuaia Woking Hostel te hi sak a nih chuan Guidelines in a sawi angin amaha inenkawl zel thei tura Public Private Partnership anga enkawl zui tur a ni bawk. Working Women Hostel sakna tura rawt te chu ZMC Complex, Lunglei Ramthar Veng, Thenzawl Field Veng, Ramhlun Sports Complex, ITI Complex, Aizawl, Champhai Kahrawt Veng leh Khatla, Aizawl-ah te an ni a. An len zawng a inang vek lova, a then chu khum 140 awm theihna tur a nih laiin a then te chu khum 40 awm theihna tur te an ni.

Myanmar ramchhung buaina avanga sahimna zawnga Mizoram-a raltlan awm mek chu kar kalta ah khan mi 205-in an pun belh niin sawrkar chuan a chhinchhiah.

Ramchhunga District leh Rural Development Block hnufualte chhawmdawl nana sawrkar laipuiin a ruahman - Sampoornata Abhiyan chu Mizoram-a District pathum-a mipui zawng zawngin an chhawr theih nan inhrilhhriat kawngah chak taka hmalak mek a ni.

Nimin Sept. 23, 2024 khan E-waste Management chungchâng Awareness Workshop chu Aizawl-a Taxation Department Auditorium-ah neih a ni.

BJP Mizoram State General Secretary Lalthangmawii leh Palak Bialtu MLA K Hramo te chuan niminpiah tlai khan Union Minority Minister Kiren Rijiju chu New Delhi-a a chenna In-ah hmuin, Mizoram mamawhte an sawipui a, Mara Autonomous District Council-in project an thehluhte a rang lama Sanction turin an ngen bawk. Kiren Rijiju chuan BJP Mizoram leh a bikin Mara Autonomous District Council hmasawnna ngaihtuah tel lovin, Mizoram ngaihtuah theih a nih loh thu a sawi a, an thil thlen chu a tih ngei tur thu a hrilh mai bakah an hmuhlai ngeiin a hming a ziah hnan nghal a, hma a lak pui vat tur thu a lo hrilh a ni.

MNF Treasurer leh MLA hlui Lalruatkima chuan MNF chu Party mai ni lovin Mizoram leh Hnam Sakhua venghimtu; Mizo Guardian a nih thu a sawi.

Planning & Programme Implementation Department hnuaia Mizoram Startup Mission (MSUM) kaltlanga buatsaih tur, Mizoram Rahbi 5.0 chu nimin tlai khan Chief Secretary Dr. Renu Sharma chuan a hawng.

Targetted Public Distribution System (TPDS) hnuaia beneficiary-te chanvo leh an harsatna chhawk zangkhai dan, Grievance Redressal chungchang inhrilhhriatna chu nimin khan Aizawl-a Vanapa Hall-a neih a ni.

Agriculture Minister PC. Vanlalruata chuan, “Tun atanga kum 10-ah chuan Mizoram hmel hi a danglam tawh hle ang,” a ti.

Transport Department chhinchhiah danin Mizoram-ah Electric hmang lirthei 554 a awm tawh.

Kumin June, July leh August thlaa Sawhthing Tâm chuan Mizoram-a kuthnathawk chhungkua 8,507 a nghawng nia chhinchhiah a ni a. Kumin hian Mizoram-ah Sawhthing chingtu chhungkaw 25,154 awmin Sawhthing quintal nuai 10 chuang a thar beisei a ni.

Serchhip District chhunga Village Council pahnih-a by-election neihna turah naktuk Sept. 24, 2024 khian mipui ten Vote an thlak dawn ta a, Campaign theih hun pawh nimin tlai khan a tawp tawh a ni.

India hmarchhak-a Krishi Vigyan Kendras (KVK) te tana Annual Zonal Workshop neih chu Inrinni khan zawhfel niin Mizoram atanga kal KVK te chuan Workshop denchhena Exhibition buatsaih ah lawmman pahnihna an dawng a ni.

Serchhip District-ah kumin chhunga ASF vanga Vawk thi leh suat chu sing khat a tling dawn hnai ta.

Central Young Chakma Association chuan thuchhuah siamin, September ni 19 atang khan  Chittagong Hill Tract cheng Chakma mipui te chu helai hmuna dan lo-a lo lut ten Bangladesh sipai chakna hmangin an beih thu leh an chenna In 100 chuang halral a nih thu an tarlang a. He pawi-khawihna ah hian Tribal mi 9 in nunna an chan thu sawiin, hetianga tharum thawhna chu an dem takzet thu leh he pawikhawihna ti tawp vat turin Bangladesh Sawrkar thuneitute an phut thu an sawi a. Hemi chungchangah hian Prime Minister ah lehkha an thehlut bawk.

National Health Mission (NHM) Mizoram hnuaia thawktu inzawmkhawmna pawl, NHM Employees Union Mizoram (NEUM) chuan sawrkara an thilphut hrang hrang chungchangah sawrkar an ngaichang mek tih sawiin, hmalakna mumal a awm lo a nih chuan September ni 26-28, 2024 chhungin Badge dum bel-a lungawilohna lantir an tum thu an sawi.

Aizawl khawpui chhunga bawlhhlawh paih lirthei hman man rualkhai leh mumal siam phutin Vawiin atang hian Aizawl Garbage Truck Owners’ Association (AGVOA), PPP Mode Bawlh-hlawh Paih Welfare leh Sanitation Driver & Handyman Association (SD&HA) te chuan tlan loh an tum a. Aizawl Mayor Lalrinenga Sailo leh Executive Corporator i/c Solid Waste leh bawlhhlawh paihtu pawl hruaitute chuan inbiakna neiin Mayor-in bawlhhlawh paih motor hman man a rualkhai theihna tura amah ngeiin hma a lak nghal tur thu a sawi avangin tiamchin awm lova din an tum chu an thulh tih Bawlhhlawh paihtu pawl hruaitute chuan an sawi a, Mayor sawi chu an ringtawk tih an sawi bawk. Aizawl-ah hian Bawlhhlawh paih motor LMV, pick-up truck leh a tlukpui 69 leh MMV, 407 leh a tlukpui 82, a vaiin 151 a tlan mek a ni.

Mizoram-a sahimna zawnga lo lut raltlante buhfai a tanpuina tur chungchangah sawrkar laipui leh Mizoram sawrkar an indawr mek.

Nimin chhun dar 1:00 vel khan Vanlalvena (37) s/o Lalrinsanga, Tuithiang Veng Aizawl chu Scooty a khalh laiin Hunthar Veng lei tlahniam ah Truck nen intipalh in Truck hian a chil zui a, ka pawh chhawn lohin a boral a ni. Vanlalvena ruang hi nizan khan lumen niin Vawiin ah vuiliam a ni ang.

India Meteorological Department (IMD) chuan ni 7 lo awm tur chhung hian Nagaland, Manipur, Mizoram leh Tripura hmun thenkhat-ah ruah tam tham tak a sur thei tih an sawi a, Assam leh Meghalaya-ah pawh Vawiin atangin ruah a sur thei tih sawiin, ramchhung State thenkhat ah pawh naktuk atangin ruah a sur thei niin an sawi.

Inrinni zing khan Champhai-ah DCSO CC. Sakhawliana hovin Legal Metrology Department, Sub-Hqrs. YMA, MHIP leh Champhai Consumer hruaitute chuan Champhai khawpui chhunga chawhmeh Bazarna hmunpui, Champhai Bazarpui, Rahsi Veng leh Vengthlang-a Sa leh thlai thar zuarte bukna leh tehna hrang hrang hmante an endik a, Bukna dik Non-Standard Spring Balance 9 leh Beam Scale (2kgs) pakhat te man an ni.

Mizoram Pollution Control Board (MPCB)-in khawl hmanga boruak bawlhhlawh dan an teh thinna ah kumin January atanga August thla chhung khan Mizoram khaw hrang hrangah boruak bawlhhlawh dan a inthlau hle.

National Cadet Corps (NCC) State Advisory Committee chu Zirtawpni khan Sports & Youth Services Minister Lalnghinglova Hmar hova thukhawmin Mizoram-a NCC hmasawn theih dan tur hrang hrang an sawiho.

PWD Minister Vanlalhlana chuan Mizoram ei leh bar chawkluhna ber NH-6 kawngpui chhia chuan mipui nunphung a tikhaihlak tih sawiin, Mizoram sawrkar pawhin mawhphurhna la in ngawrh taka siam mek a nih thu a sawi.

Tunkar Zirtawpni leh Inrinni, September 27 leh 28, 2024 chhung khian 21st Annual Conference of Commonwealth Parliamentary Association, India Region, Zone-III chu Aizawl-ah neih a ni dawn.

National Highway-06 (NH-06) Kawnpui leh Khamrang inkar kawng chhia thawmthat hna chu thawh mek niin Inrinni tlai atang khan nitin mamawh bungrua (essential commodities) phur lirtheite chu kaltlang tir tan an ni leh tawh.

Aizawl khawpui chhung Traffic enkawlna felfai leh tha zawk a awm theihna tur atana ruahman, Adaptive Traffic Control System (ATCS)/Pelican Crossing chu hman theiha ngaih a ni lo a, hmun thenkhata mi phei chu lak thlak a ni tawh.

Myanmar ramchhung Chin State-a Chin National Front (CNF), Interim Chin National Consultative Council (ICNCC), Chin Brotherhood leh Chinland Council te chuan Inrinni khan Aizawl-a inbiain inremna tluantling a awm theih nan a tul dan a zira inbiakna neih leh nise an ti.