World Rabies Day-ah ‘SAPRE’ tlangzarh a ni

Khawvel hmun dangte rualin Inrinni khan ‘World Rabies Day’ pualin Aizawl Khatla-a Hotel Royale Lalawi-ah 'Breaking Rabies Boundaries' tih thupui hmangin hun hman a ni a, he hun hi Health Minister Lalrinpuii chuan a hmanpui a ni.

Kumin-a World Rabies Day-ah hian kum 2030 ralhma ngeia Ui a hri umbo tura hmalakna, 'State Action Plan for Rabies Elimination' (SAPRE) chu Health Minister hian a tlangzarh a; heti hian Mizoram, Tamil Nadu leh Meghalaya-te chu India rama State Action Plan for Rabies Elimination tlangzarh hmasa ber an ni.

World Rabies Day puala hun hman ah hian Health Minister Lalrinpuii chuan an hmalakna tur, SAPRE chuan State chhunga Ui a hri umbona kawnga hmalakna a tihchak lehzual ngei a beisei thu sawiin, Mizote chu ran ngaina tak kan nih thu leh khawtlang nunphung, eizawnna leh nitin khawsakna ah ran te'n hmun pawimawh tak an chan thu a sawi a. Ram hmasawn zelah Ui breed hrang hrang a awm zel a, chhungkaw member ang hiala ngaih ni mah se, pawnlam mite tana hlauhawm leh harsatna thlentu an nih loh nan a enkawl zui kawngah tanrual a ngai a, Ui huaisar leh kawlhte ven uluk a ngai hle tih a sawi a. Damdawi In hrang hrangah Ui seh avanga hri danna la tam tak an awm thu sawiin, Ui a seh chu khawvel pumah kumtin mi 56,000 chuangin an thihpui thin thu leh India ramah pawh kumtin mi 20,000 chuangin an thihpui thin thu a sawi bawk. 

Health Minister chuan World Health Organisation hmalakna 'One Health' concept chu nasa lehzuala kalpui leh inhrilhhriat tam a pawimawh thu pawh he hunah hian sawiin, WHO, FAO leh OIE te'n kum 2030 ralhma ngeia Ui seh atanga natna kai avanga thihna thleng thei tihreh tuma hmalakna an nei chu tha a tih thu leh hemi tihlawhtling tur hian NHM hnuaiah National Rabies Control Programme (NRCP) chak taka kalpui a ni chu lawmawm a tih thu a sawi a. Rabies Control Programme hnuaia Health Department leh Vety Department-te thawhdunna fakawm a tih thu sawiin, Ui seh atanga natna kai avanga mihring thihna thleng thin umbo turin hemi kaihhnawih Sawrkar Department leh NGO hrang hrangte inkarah thawhhona tha tak a awm zel a beisei thu a sawi bawk.

World Rabies Day hi kumtin September 28-ah hman thin niin Scientist hmingthang tak leh Antirabies Vaccine hmuchhuaktu Louis Pasteur-a thih champha hriatreng nana hman thin a ni a. Kum 2007 atang khan he ni hi khawvel hmun hrang hrangah hman tan niin kumtin hman chhoh a lo ni ta a ni. College of Veterinary Sciences & Animal Husbandary (CVSc &AH), Central Agricultural University, Selesih te pawn kum 2013 atang khan he ni hi kumtin hmangin Ui leh Zawhte te tan a thlawnin Ant-Rabies vaccine pek thin a ni.