Consumer te I harh ang u - XLII :

Online Gas Book na tha tak INDIANOIL ONE Mobile Apps

- Laldinpuia

Khawvel a changkang chho zel a, thil thar leh kalphung thar leh tha zawk a lo awm zel a. Hemi mila inherrem hret hret zel hi consumer tena kan tih tur leh mawhphurhna a ni a, chumi inherrem nachang hre tur chuan Consumer te hian kan chhehvel thil kalphung kan zir chian a, kan hriatna leh finna kan tihpun ve zel a tul hle a ni. Thil a danglam chho zela tun hmaa kan tihdan phung ang reng khan thil a lo tih theih tawh lohva, changkanna mila kan insiamrem a ngai zel tawh. Tunah chuan Bank a pawisa lachhuak turin tunhmaa kan tihdan Withdrawal Slip nena Bank a intlar kher kha a ngai tawh lo a, awlsam takin ATM Booth-ah kan duh hun hunah kan lachhuak mai thei tawh a ni. TV kan en dan phung te pawh a danglam mek a, Ration Buhfai kan lak dan te pawh a lo danglam zo tawh a, mitin deuhthawin Mobile Phone kan hum tawh a, heng hmang hian tunlai khawvel thiamna milin kan che a, kan chet phung leh khawsak hi kawng tam takah a awlsam rualin rual u deuh zawk te tan chuan buaina tur pawh a tam tho mai. Hemi kawngah hian zawi zawia kan insiamrem chhoh zel erawh a ngai dawn a ni.

Tun hma chuan eirawngbawlna Gas te pawh kan Gas connection bu kengin kan la mai a, mahse kha aia felfai zawk leh awlsam zawk kha chin chhoh zel a ni ta a, tunah chuan hmun tam zawkah chuan online booking kaltlanga Gas hi lak a ni tawh a, heng kalphung thar leh chin dan thar te hi a hmang thiam tan chuan awlsam tak anih laiin kum lama upa zawk leh hmun kilkhawr zawka awm te tan chuan thil harsa tak, inzirtir fe ngai a ni thung a.

Thil thar leh kalphung thar leh tha zawk a lo awm zel a. Hemi mila inherrem hret hret zel hi consumer tena kan tih tur leh mawhphurhna anih angin zawi zawia kan nunphung kan siamrem chhoh zel hi a la tul zel dawn a, chumi inherrem nachang hre tur chuan Consumer te hi zirtir kan ngai a, kan awlsam na zawk tura thil thar duan hi a hmang tangkaitu leh a nihna tur ang taka kan awlsamna zawk atana hman a nih theih nan inhrilhhriat hi kan mamawh hle a ni.

Tuna eirawngbawlna Gas kan book danah hian whatsapp booking te, miscall leh mobile apps hmanga book te hi a tlanglawn te an ni a. Heng zingah hian a hmang thiam tan chuan awlsam leh fel famkim zet mai IOC lam ina an ruahman mobile apps hmanga book dan hi kan sawi zau dawn a ni.

Indianoil One Mobile apps hi Indian Oil Corporation in a a siam a ni a, Indane Gas subscriber bakah IOC Petrol pump ringte tan a tangkai hle a ni. Google search-ah emaw, Play store leh istore-ah te INDIANOIL ONE tiin search in download mai theih a ni. He mobile apps in a tih theih langsar deuh te chu –

å Online Gas Book

å Booking History check

å Subsidy check leh a lut lo complaint

å LPG Connection siamthat

å Distributor thlak

å LPG Connection thar dil

å LPG Complaint

å Customer Care contact

å Bank Account link

å Adddress siamthat

å Phone number thlak

å Mixed connection ah duhthlan

å Kan bul hnaia IOC Petrol pump hlat zawng leh fuel man thar ber hriat.

Khing ho khi consumer te tana tangkai tak tak hlir a ni a, chuvang chuan khimi Mobile apps hmangtu chuan a chunga tarlan ang khi a tih theih vek avangin a tha hle a. Buai chung chunga mahni Gas agency te va pan ngai ngai lovin kan harsatna tam zawk chu awm hmunah online hmanga a chinfel theih tihna a ni deuh ber mai. Tin, Subsidy luh leh luh loh a en theih mai bakah a lutlo tan complaint a siam nghal theih a, kan Gas lak dan chungchanga harsatna kan nei anih pawhin complaint a siam theih bawk a. He Mobile apps hi online hmanga Gas book thin tan chuan a awlsam in a tangkai em em a ni.

He Mobile apps-ah hian Gas connection LPG ID leh mobile phone leh email hmangin awlsam taka in register mai theih a ni. A apps a in register tawh chuan miscall emaw, whatsapp kaltlanga book ai khan Gas book a awlsamin kan book tawh dan leh a detail hrang hrang a check theih bawk a, a tangkai hle. Chuvang chuan Gas online a book thin te chuan hman thiam tum ila, a tirah kan thiamlo anih pawhin awlsam te a inzir mai theih a ni. Kan tana awlsam leh tangkai tur thei anga siam anih avangin he mobile apps hi consumer te hian i hmang tangkai theuh ang u.