C&I Minister in hmanpui

Federation of Industries in North Eastern Region (FINER) bultumin nimin khan ‘International Conference on MSMEs in North East’ chu nimin khan Aizawl-a I&PR Auditorium-ah neih a ni.

He Conference hi Commerce & Industries changtu Minister F. Rodingliana chuan hmanpuiin Mizoram chu Agro-based leh Horticulture based industries tan theihna (Potential) nasa tak neih ni mahse haichhuah loh a la nih thu a sawi a, hei vang hian sawrkar kal mek chuan chutiang haichhuah nan leh mi taima te dinchhuah veh nan ‘Bana kaih’ (Hand holding) policy a duangchhuak ta tih a sawi a. MSME te tan sawrkar chu anmahni puih turin a ding reng dawn tih sawiin, tunah pawh hian sumchang thlai (cash crop); Aieng, Sawh-thing leh Hmarcha chingtu te tan ruahmanna felfai tak siam niin, anmahni dawmkanna tur sum pawh budget dah a ni tih a sawi a bawk.

C&I Minister chuan Mizoram chu tlangram a nih thu leh inkalpawhna kawngpui te a tha tawk lovin kum khatah ni 100 chuang te ruah a sur bawk nen, industry din leh project han kalpui nan sum sen pawh sang deuhvin, MSME Policy leh Guidelines pawh State dang leh hmun danga an hman ang te hi hman ve diak diak thei loh chin a awm thu a sawi a, amaherawh chu India rama state ralmuang ber, lehkhathiam tamna leh Sakhaw khat leh Culture khat vuan kan nihna hian thiltih a ti awlsam a. Mizoram Sawrkar pawh MSME te tan a inhawng zau em em a, anmahni tanpuina tur leh dawmkanna tur policy tha tak tak a nei bawk a ni, tiin India ram state dang leh India ram pawn lama MSME te chu Mizorama lo kal a, industry lo din a, tualchhung mi MSME te leh sawrkar nena thawkho turin a sawm a ni.

He Conference-ah hian Mizoram chhung leh pawn lama Entrepreneur te bakah Entrepreneurship lama tui zirlai naupang MZU leh College hrang hrang 5 atanga telin thupui pawimawh tak tak zirho a ni.